聞西──配是拉差 一醬功成咕嚕肉

 2022-03-24
聞西──配是拉差 一醬功成咕嚕肉

由細到大我都好無自信,細個寄養喺親戚屋企經常捱打捱罵,鬧到我自尊同信心都唔見晒,成日頭耷耷唔夠膽望人。即使過咗咁多年,我宜家有時候仲會係咁,好似煮飯畀朋友食,人哋明明都讚好味,但係我永遠都覺得自己煮得唔好,朋友以為我過份謙虛,其實係反映我嘅兒時陰影至真。年半前,有媒體邀請拍攝一個三餸一湯嘅網上烹飪節目,節目播出之後有讚有彈就好正常,但其中有個留言我好介意,大致係話我「揸刀都未識仲好意思去教人,真係唔知醜!」幸好我內心強大即刻block咗佢,一於唔好睇、唔好聽、唔好信。

講真我冇受過專業廚藝訓練,同好多媽咪一樣都係邊煮邊學,所以唔夠膽話教人喇!只係將自己學到嘅經驗同大家分享,咁樣味道先可以傳承落去。就好似經典家庭小菜咕嚕肉咁,好多媽咪識煮,要煮得好食就唔係咁容易,梅頭肉要炸到香脆,甜酸汁又要調教得宜(買現成嘅例外啦),而且成敗關鍵在於打芡,個汁要夠杰先可以包住肉嘅表面,如果個汁太水就會整腍咗啲肉個脆皮,咁就唔好食㗎喇。畀多個貼士大家,上粉除咗粟粉之外,加埋粗粒番薯粉可以增加脆脆嘅口感。另外,甜酸汁我會加少少是拉差醬,味道就更加豐富,同埋啲色水都會靚啲㗎!




材料:
梅頭肉200g、菠蘿約120g、細三色椒各1隻、蔥段適量、雞蛋1隻、粟粉2大湯匙、粗粒蕃薯粉2大湯匙



醃料:
糖及鹽各1/4茶匙、紹酒及生抽1/2茶匙

甜酸汁:
糖................2湯匙
米醋............1湯匙
是拉差醬.....1湯匙
茄汁............3湯匙
清水............4湯匙



做法:
1. 梅頭肉切成1/2厘米厚嘅肉片,落醃料醃15分鐘。



2. 粟粉加粗粒蕃薯粉撈埋,肉片加蛋黃拌勻然後上粉。之後,用中火炸至外表金黃色。