聞西──香草瑞士雞翼 絞盡鹵汁滿足老友

話說前排朋友去完中環太平館食瑞士雞翼之後，好想試吓自己整，就WhatsApp我問有冇食譜，我答佢：你要過多幾拾年先有得食㗎喎，佢即刻畀個嬲嬲emoji我。實情係人家個鹵水膽已經有幾拾年歷史，你以為一日半日就可以整到？其實我個人唔係咁mean㗎，只不過想朋友知道，人生同鹵水汁一樣，要越多經歷先會越有味道。最後我梗係有滿足佢嘅要求，佢即刻開心返晒！

瑞士汁主要材料有豉油、老抽、冰糖等，唔同牌子嘅豉油煮出嚟嘅顏色、味道都會有分別，不過都係嗰句：一分錢一分貨，就用支好嘅啦！老抽係用嚟上色用，但我選擇用雞飯醬油代替（或者叫黑醬油）。雞飯醬油顏色較深，質地濃稠杰身，我覺得更適合用嚟做瑞士汁，而且佢冇老抽咁鹹，比較健康啲。有啲食譜會落甘草同香葉，係傳統嘅做法，我就會用新鮮百里香再加甘筍增加鮮甜味。新鮮有時候都係一種優勢，好嘅豉油、靚嘅黑醬油，加埋新鮮元素，呢個就係我嘅瑞士汁版本。

今次好難得喺某超市買到新鮮雞全翼，我當然唔會放過。不過，唔理急凍定新鮮都好，一定要先飛水去除血水同雜質，免得影響鹵汁嘅味道。事實上，個汁仲可以用嚟撈飯，我更喜歡刀削麵加瑞士汁做乾拌麵，超級好味呢！

材料：
雞翼...............8隻
刀削麵............2個
芫茜...............1棵

瑞士汁：
水1公升、豉油180ml、雞飯醬油120ml、玫瑰露1/2湯匙、甘筍1條、百里香1至2棵、冰糖100g

做法：
1. 豉油、雞飯醬油、玫瑰露預先拌勻，甘筍去皮切成粗條，預備小煲加水落冰糖煮滾。

2. 豉油、雞飯醬油、玫瑰露加入煲內，再放甘筍及百里香，冚蓋用中細火煮20分鐘。等個汁轉濃，撈起甘筍及百里香，呢個時候記得試味。

3. 雞翼飛水過冷河，用廚紙抹乾後放入瑞士汁，直至再滾起計煮10分鐘。如果想食腍身啲就煮多5分鐘，等熄火浸20分鐘然後撈起。

4. 煲水煮熟刀削麵撈起，加入適量瑞士汁。麻油同芫荽段撈勻，將麵放碟上，再放上雞翼就大功告成。

小貼士：
1. 煮雞翼一定要用細火，否則雞皮裂開就唔靚㗎喇。上碟前可掃上麻油，賣相會更加出色。

2. 通常第一次整嘅鹵水汁味道會較單薄，大家可首先試吓鹵豬腩肉，等豬油同肉汁滋潤吓個汁，之後再鹵其他嘢會好味啲㗎。