聞西──雪燕火腿冬瓜夾 娘快嘆一嘆

一下子又嚟到三十幾度嘅高溫天氣，著恤衫西褲返工嘅我真係好唔習慣，而唔習慣嘅仲有啲蔬菜，始終夏天嘅菜冇冬天咁好食。正所謂不時不食，呢個時候梗係食瓜好，要消暑首選一定係冬瓜，以前一到夏天，阿嫲就會成日煲冬瓜湯。開講有話各處鄉村各處例，我阿嫲就係鍾意煲甜嘅版本，冬瓜加去濕料再加少少冰糖，呢種唔鹹又唔係好甜嘅味道唔係咁啱我，不過阿嫲話有益，我梗係會「骨碌骨碌」咁乖乖飲晒佢啦！

正常冬瓜每個最細都有廿幾、卅斤，名副其實叫大冬瓜。因為冬瓜要種得夠大先會肉實汁豐有瓜味，所以嗰啲迷你冬瓜仔就真係麻麻哋。另外有種外形肥肥矮矮嘅叫灰冬瓜，瓜身佈滿銀白色灰，街市菜檔阿姐話灰冬瓜比較清甜，用嚟滾湯最好，當然比綠皮冬瓜又賣貴啲。另外冬瓜都有分頭尾，瓜頭位置肉質較硬，適合用嚟炒或者燜煮，瓜尾水份多同稔身，可以用嚟煲湯或者打茸。

傳統粵菜裏面有一味餸叫做火腿冬瓜夾，簡單得來又可以好精緻，而且鹹火腿永遠都係清甜冬瓜嘅最佳伴侶，兩者放埋一齊已經好好味。不過，今次因為煮其他嘢用剩咗好多雪燕，不如試吓加埋落去一齊煮，雪燕索晒冬瓜嘅鮮甜，又分擔咗鹹火腿部份嘅鹹味。放一件鹹火腿冬瓜夾落小碗，加一湯羹雪燕，就好似一座冰山咁樣，望落都透心涼。

材料：
冬瓜........約斤半
鹹火腿........適量
雪燕.............20g
鰹魚湯包......1個

做法：
1. 冬瓜去皮瓤後，先切成扇形件，然後再按厚度切成11/2厘米厚片，每片冬瓜中間從向皮嘅一方切一刀至3/4為止，以做成冬瓜夾。小心，唔好切斷。

2. 鰹魚湯包用300ml滾水煮5分鐘成上湯，怕冬瓜寒涼，加幾片薑同煮。

3. 鹹火腿切成薄片，大小最好足夠釀入冬瓜夾，我切得比較大片，係想方便大家睇到個效果。如果怕鹹用普通火腿代替都得，不過味道就會清淡啲。

4. 將冬瓜夾整齊排好落煲，再落發好嘅雪燕，加入上湯至材料表面。開火煮滾大約煮5分鐘，見到冬瓜呈半透明狀態就搞掂，或者按個人喜好打個薄茨。

【溫馨小提示】
雪燕由雪蓮花分泌嘅汁液提煉而成，係一種純天然植物纖維食品，外表及質感都同燕窩好似。留意雪燕要早半日浸發，而由於會膨脹好幾十倍，所以唔好一次過浸太多。雪燕滋陰養顏，今個母親節可以煮畀媽咪試吓啦！