聞西──三餸一湯食到悶 三色卷營養滿FUN

 2022-07-14
聞西──三餸一湯食到悶 三色卷營養滿FUN

炎炎夏日冇晒胃口,有朋友話喺街市行咗幾轉都諗唔到煮乜餸俾屋企人食好。其實做「家庭煮婦」真係唔容易,又要傷神照顧屋企大小事務,又要去街市買餸身水身汗,呢份工唔係咁易做。

言歸正傳!其實又唔係每日都一定要三餸一湯白飯任裝嘅,有時都可以攪攪新意思,我識得有個朋友,將煮飯仔變成親子活動,有時會安排小朋友一齊參與預備晚餐,咁當然係比較簡單嘢啦,例如越南米紙卷。

基本上越南米紙卷係唔使煮嘅,米紙卷亦可以隨意放唔同嘅餡料,好似最常見嘅生菜、越南粉絲、熟蝦仁、牛油果、軟殼蟹、扎肉等。最困難部分莫過於將「硬掘掘」嘅米紙整軟,最初以為好簡單,原來浸得太耐又唔得,太少水又會唔夠軟,所以掌握到合適水份十分重要!

整軟米紙有學問 浸完要搽油

我嘅方法係先將整塊米紙浸濕,揈咗多餘嘅水份之後拎起鋪喺碟上面,等一陣佢就會自動變軟,如果怕太濕可以準備一塊乾淨嘅濕布印下米紙上水份,要留意米紙好容易乾同埋黐埋一嚿,所以整好嘅米紙卷要搽少少油,另外如果唔係即刻食要用濕布冚住,最好當然係即刻食啦!




今次我就複雜啲,先整三色蔬菜豬肉卷,再用米紙包成一口Size,三色蔬菜豬肉卷亦可以變成小朋友嘅LunchBox菜式,有肉有蔬菜都幾健康㗎。



材料:
越南米紙.......12張
豬肉片.............6片
法國邊豆.......18條
甘筍...............半條
金菇...............半包
薄荷葉............適量



醬汁:
清酒、味淋、醬油及糖各1湯匙黑醋2湯匙。



自製魚露汁
愛吃辣之選


P.S.除咗日式黑醋汁,愛吃辣人士仲可以自製另一款醬汁。事緣前排自家種嘅辣椒仔大豐收,我就用嚟整辣椒魚露,切咗辣椒仔個「錠」(花梗),然後略略「椿爛」,再加入魚露浸幾日就攪掂!

做法:
1. 甘筍切條、金菇洗淨後切去根部、法國邊豆切去豆尾。



2. 豬肉片放在砧板上,落少少胡椒粉同鹽調味,之後將適量甘筍條、法國邊豆及金菇放喺豬肉片下端然後捲起。