聞西──山藥醉雞鍋 善用花雕唔使雕花

最近神級前輩香港四大才子之一美食家蔡瀾先生，喺佢自家Facebook提到近年唔少「大廚」喺網上教人煮餸嘅亂象，文中批評一位白袍大廚教人煮鯧魚嘅影片，指當中除咗亂煮之外，更出現連豆瓣醬都話要切碎嘅奇異畫面，實在令人匪夷所思。蔡瀾話睇完條片覺得冇咩好學，又自嘲自己廚藝絕對比唔上呢位大廚，不過煮嘢愈簡單愈好，如果唔係出街食好過！

係咪拍片做show畫蛇添足最後淪為笑話，咁就見仁見智。不過，我好認同喺屋企煮嘢唔使太過複雜嘅，好在我今次介紹嘅山藥醉雞鍋又真係冇乜難度，好多朋友試過都讚好，尤其欣賞加咗山藥，嗰份綿密入口即化嘅口感實在太正喇！而且仲好有飽肚感咁話。近排天氣涼涼哋，好適合三五知己圍爐取暖，傾傾計齊齊食個醉雞鍋，補身又補心！

整醉雞鍋首先要買湯底料，一般藥材舖或者雜貨店都有執好晒一包包嘅賣，通常裡面已經有齊北芪、黨參、當歸、海竹、淮山、杞子、圓肉、紅棗等材料。有人話啲藥材要浸又話要煲成個鐘，我嘅做法只係將藥材沖洗乾淨直接放落滾水，細火煲半個鐘就得，早啲煲好待幾個鐘等材料自然出味，慳水慳力喎。另外，我一定會買黃油雞，因為雞油會令湯頭香好多，湯底嘅顏色都會靚啲，冬天食肥啲啲冇問題啦！仲有雞件要用粗鹽同花雕酒醃定，食之前將雞件連酒一齊落鍋煮熟就得，咁樣雞肉就帶有微微酒香。如果想湯頭酒味更濃，可以喺食之前落半杯花雕酒，與眾不同嘅關鍵就喺呢啲小步驟喇！

材料：

已斬件黃油雞.......1隻

醉雞鍋湯料..........1包

花雕酒..................1枝

乾木耳...................20g

薑..........................80g

蒜頭.....................6粒

細花菇.........8至10隻

日本山藥.............300g

蟲草花.....80g（裝飾用）

水約..............1.5公升

做法：

1. 木耳浸軟切件，花菇浸軟剪去菇腳，另預備蒜頭及薑片。雞件洗乾淨放入盤中，加兩湯匙粗鹽拌勻，倒入花雕酒直至浸滿雞件，之後醃半日或者二、三個鐘。

2. 將醉雞鍋湯料沖洗乾淨，1.5公升水用平底煲煲滾，再落醉雞鍋湯料、蒜頭及薑片，冚蓋滾起計煲半個鐘。之後加入木耳及花菇，待再次滾起即熄火焗至少兩個鐘。