聞西──荔芋香酥乳豬 脆味橫生綿裡藏

最近經常聽到見到Hello Hong Kong呢句口號，政府出錢出力唱好香港，之不過同時亦有人喺度倒緊米！

近日有朋友喺Facebook寫道：我真係攞嚟賤！話說，佢去咗幫襯中環米芝蓮燒鵝店，呢間店喺疫情前服務態度出名麻麻，事發當日朋友諗住食個快飯，聽到隔離枱有三個講英文既遊客，佢哋想叫半隻燒鵝加一隻燒鵝髀，但個女夥記就自作主張話燒鵝脾加個叉燒夠食啦！之後個遊客又叫多隻燒鵝脾，我朋友聽到佢哋講：都係咁多骨嘅！我朋友搭咀話應該要上半身有胸嘅，遊客就叫我朋友幫佢叫燒鵝上莊，點知個女夥記黑面咁話：咁佢頭先唔要半隻？原來佢已經唔記得咗係佢自己屈人食燒鵝脾加叉燒，跟住個女夥記仲同我朋友講：你食完啦！你仲唔走……

好想代香港同嗰幾個遊客講聲「Sorry Hong Hong」，錢當然要賺，不過要賺得有道，任何人都唔應該貼錢買難受。其實，有好多唔出名嘅燒臘舖都好好食，服務態度仲好好添！今次分享嘅荔芋香酥乳豬食譜都同燒臘舖有關，因為要買乳豬。不過，煮完都係覺得用燒鴨好味啲又經濟啲，學識咗整荔芋蓉，又可以整芋頭魚，啱晒我呢個芋頭粉絲。芋蓉要做到酥脆，秘訣在於要落同等份量嘅動物油或植物油，當然仲要加澄麵芋蓉先唔會散晒啦。

調味料：

鹽.........................3/4茶匙

五香粉.................3/4茶匙

糖............................1湯匙

胡椒粉.................1/4茶匙

材料：

乳豬........................1大件

芋頭..........................250g

澄麵............................75g

滾水..........................75ml

動物油或植物油..........50g

（今次我用咗台灣出品嘅鵝油）

做法：

1. 芋頭去皮切件隔水蒸20分鐘，取出立即用叉壓成芋蓉。澄麵落滾水拌勻，再用手搓成麵團，調味料拌勻備用。

2. 芋蓉加入調味料及澄麵徹底搓勻，再倒入油份搓至軟滑均勻為止，然後放入雪櫃雪30分鐘。