聞西──金沙蝦醬肉丸 粒粒鹹多多脆

經歷959日之後，上星期終於等到解除口罩令呢一日。相信好多人同我一樣，唔經唔覺戴口罩已經成為生活嘅一部分，出街前會揀口罩顏色襯衫，喺餐廳食完飯又會乖乖戴返，亦都習慣咗以半邊面見人，有時夜闌人靜又會偷偷哋除低個口罩。宜家終於可以光明正大咁，唔戴口罩出街，呼吸返自由嘅空氣！之不過解除口罩令首日，大部分市民仍然選擇戴口罩嘅呢個情景，似乎話畀大家知改變仲需要啲時間。

其實戴定唔戴都係個人嘅選擇，所以對於有啲朋友對繼續戴口罩嘅人說三道四，我就唔係咁認同喇，請緊記要尊重其他人嘅選擇！唔知大家有冇打算開個Party，慶祝生活正式復常呢？開Party梗係唔少得小食，呢個金沙蝦醬肉丸又會唔會成為大家嘅選擇呢？

做肉丸首先要有豬肉，我個人好懶又冇乜要求，所以選擇用超市嘅黑毛豬免治豬肉。想彈牙啲，可以喺材料混合之後，將肉撻大約十下至起膠狀，同時擠出裡面嘅空氣，然後放雪櫃雪最少30分鐘，如果加梳打餅碎，就可令肉丸乾身啲冇咁易散，想濕潤啲就唔好加喇。最後，包上地瓜粉去炸，肉丸就會有一層脆脆嘅外衣。呢個肉丸有蝦醬有鹹蛋黃仲有玫瑰露，鹹香脆口，就好似嗰隻天神送畀人間嘅金X朱古力一樣咁珍貴。今次仲專登用埋呢款朱古力個盒擺盤，為Party加點趣味！

材料：

免治豬肉...........350g

鹹蛋黃................5隻

梳打餅.....1塊半左右

蔥.......................適量

地瓜粉...............適量

麻油................1湯匙

醃料：

粟粉........................2茶匙

玫瑰露....................1茶匙

蝦醬.....................1/2茶匙

胡椒粉.......................少許

做法：

1. 鹹蛋黃蒸20分鐘後用叉壓碎，梳打餅壓碎至狀如即食麥片大細即可，免治豬肉加醃料拌勻。

2. 將（做法1）嘅所有材料置於大碗中，加入麻油後用手搓勻至所有材料完全混合，再撻約十下至起膠。