聞西──惹味泰式魚肚炆雞

一切都是機緣巧合。究竟是我在創作食譜？還是我遇上了食譜呢？我想是後者居多。廚師有時候就好像藝術家畫畫一樣，都是即興發揮，隨心而轉，結果往往出人意表，令人喜出望外！

入秋後突然很想吃煲仔菜「冬菇魚肚炆雞」，一想到吸滿汁的魚肚就流晒口水了！幸好家裏的糧倉長期備有沙爆魚肚和冬菇，於是上班前把魚肚及冬菇泡水浸軟，放工後到超市買半隻雞，再用胡椒粉、鹽及粟粉略醃便可。鍋子和材料都準備好了，怎料突然心血來潮，想試試用泰式煮法，結果收起了冬菇，改用泰式辣醬及魚露調味，加上自己種的金不換，味道非常濃郁，少少辣，很惹味。今次真的要謝謝自己的任性，又遇到一個非常滿意的食譜！

魚肚價錢便宜，可以分沙爆和油爆，前者像炒栗子，以燙熱的細沙爆炒，但魚肚有機會殘留沙子。油爆則以油炸方法令魚肚更鬆化，雖然有人說較油膩，我倒覺得分別不大。好的魚肚毋須汆水，聞起來應該沒有腥味及油饐味。

做法 :

1. 將雞件洗淨，落醃料醃半個鐘。蒜頭、乾蔥頭剁碎，大紅椒切片，魚肚切件。

2. 冷鑊落油，落蒜頭、乾蔥頭及泰式辣醬，用鑊鏟拌勻才開慢火炒香。之後落雞件轉中火，炒至雞油溢出，表面金黃色。

3. 落魚肚炒勻，加入水份再冚蓋，滾起後計轉用慢火燜煮半個小時。

4. 轉大火煮至汁液轉濃稠，最後加入金不換葉及紅椒片炒勻，鏟入已預熱之煲仔即成。