聞西──是拉差煎釀豆腐 微速搶手唔搶喉

DSE上個禮拜已經放榜，成績好嘅同學仔固然開心，成績唔好嘅都唔使氣餒，做人最緊要係腳踏實地，書讀唔成都可以有好多出路，千祈唔好睇少自己。今期同大家分享一個關於是拉差辣椒醬創辦人David Tran嘅故事，教我哋邊度跌低就喺邊度起返身！

David生於越南西貢，亦係越南華僑，屋企以種植辣椒起家。七十年代，開始生產沙茶醬同埋是拉差（Sriracha）辣椒醬，當時相當成功，於東南亞地區廣受歡迎，不過佢喺1979年為咗逃避戰亂展開逃亡之旅，曾經被關押喺香港嘅越南船民難民營，2023奧斯卡最佳男配角關繼威都係佢同期營友。後來David移民去美國，由零開始重操故業再種辣椒同生產是拉差辣椒醬，創業初期每日去到當地嘅中餐廳做推廣同送貨，之後建立起口碑生意越做越大，而家每年賣出過千萬樽是拉差，營業額達過億美元。

當然成功嘅背後有好多因素，但你唔努力過、嘗試過又點知唔會成功呢？就好似我今次嘗試用是拉差醬煮餸，結果大成功！是拉差辣椒醬微辣唔搶喉，而且帶少少甜，加咗茄汁同豆瓣醬之後，酸甜味更加突出，非常好味！我即刻諗到配煎釀豆腐應該唔錯，加埋爽脆嘅乾蔥頭同埋飛魚子，一個餸就有齊軟、滑、爽脆嘅口感，正呀！

材料：

煎釀豆腐...............1件

墨魚滑..................150g

蝦米仔....................10g

飛魚子....................60g

乾蔥頭...................2個

鹽....................1/4茶匙

胡椒粉...................少許

醬汁：

是拉差辣椒醬.....2湯匙

茄汁...................2湯匙

豆瓣醬................2湯匙

水.......................2湯匙

糖....................1/2茶匙

做法：

1. 蝦米先浸軟，然後剁成粒粒，乾蔥頭去衣切片。墨魚滑放喺大碗中，落蝦米、鹽及胡椒粉用筷子或者手拌勻，然後用手撻至起膠，亦可以加蔥粒或者芫茜碎，視乎你個人喜歡。