聞西──羅馬式燉牛尾 夠腍夠香又甜甜地

雖然有權選擇都係一種自由，不過好唔好又係另一回事。話說有個朋友經常標榜自己識飲識食唔貴唔食，甚至旅行都只會揀米芝蓮餐廳，成果貴族咁款。其實，世界好大㗎，眼光可必咁狹窄呢，平嘢唔一定係差，下欄嘢都可以發光發亮，就好似今期嘅主角「屠夫式燉牛尾」。

呢個係一個好傳統嘅意大利菜式，個餸名都有段故仔。從前羅馬屠夫宰殺牛羊之後，會將肉分成四個等級，最高級嘅由貴族專用，第二級會畀神職人員及傳教士，第三級會畀中產階級，最後一級就會分畀士兵，而啲內臟同埋頭頭尾尾，就會被視為下欄嘢，會分畀屠夫及工人，當係佢哋人工嘅一部份。不過經過屠夫悉心烹調，呢啲頭頭尾尾反而變成佳餚，最後更成為羅馬嘅名菜，其中一道就係呢道「屠夫式燉牛尾」，可以話係當時嘅窮人恩物。

講真我覺得成條牛脷好肉酸，真係唔夠膽去處理，不過最近喺超市發現有急凍和牛牛脷芯賣，只要解凍就用得，咁就試吓煮啦！不過一條過百蚊實在有啲貴，於是乎又加啲牛尾一齊煮，下次再加埋牛肚應該會唔錯！由於炆嘅時間頗長，我提議一次過炆多少少慢慢食。西式燉肉通常都會落甘筍、西芹、洋蔥，以增加香甜味及醬汁嘅厚度。食譜唔使落酒，一家大細都啱食，牛脷及牛尾肉真係好腍好香，個汁用嚟撈意粉都好啱，用嚟配飯甚有港式西餐嘅味道。

材料：

牛尾...................1200g

急凍和牛牛脷芯.....2條

煙肉粒....................80g

洋蔥.......................1個

甘筍.......................1條

西芹.......................4條

蒜頭.......................4粒

上湯...................500ml

調味料：

新鮮百里香...........數條

乾牛至香草........1茶匙

肉桂粉.............1/4茶匙

香葉.......................2片

茄汁.....................80ml

茄膏.....................80ml

（可用250ml番茄糊代替茄汁及茄膏）

做法：

1. 先準備配料，洋蔥、甘筍、西芹全部去皮切粒，蒜頭去衣略拍碎。

2. 牛尾及牛脷落適量鹽及黑胡椒略醃，之後煎到兩面金黃取出備用。

3. 炒香洋蔥及煙肉粒，再落蒜頭、甘筍、西芹粒炒香，然後加入500ml上湯、500ml清水及調味料。

4. 將牛尾及牛脷回鍋，冚蓋煮滾轉慢火煮3個鐘，中途要翻動牛尾及牛脷，水唔夠可以再加。煮好之後，取出鍋內嘅香草、牛尾及牛脷，利用食物處理器將醬汁打至順滑，落鹽調味，牛脷切件與牛尾同上碟，最後淋上醬汁。

【小貼士】

長時間炆煮最好用鑄鐵鍋，貪佢保溫及鎖水能力高，用埋電磁爐就最慳火慳力。