聞西──梨蓉炆牛肋條 韓式爽甜唔嘢少

經常都有朋友仔問我：你係唔係好鍾意煮嘢食㗎？我嘅標準答案係：如果唔鍾意就唔會堅持咁耐啦！數數手指入廚已經超過35年，有時都想放棄唞下，不過最近睇完韓國大熱烹飪比賽節目「黑白大廚」之後，可以肯定我對烹飪團火仲未熄嘅！

「黑白大廚」絕對係一個刺激又熱血嘅烹飪比賽節目，真係令人大開眼界、刷新三觀！都未試過睇烹飪節目會睇到咁緊張、興奮、感動，你會睇到廚師們對烹飪嘅熱情、用心、尊重、執著……甚至烹飪改變咗佢哋嘅人生！最大賣點就係套用咗階級制度做主題，以星級大廚對戰餐廳廚師及民間高手，分成黑白兩個陣營對壘，過程充滿對抗性、娛樂性！節目仲請咗韓國重量級美食家人稱「白老師」嘅白種元，及韓國唯一米芝蓮三星餐廳主廚安成宰做評審，佢哋嘅評語一針見血、分析透徹，觀眾可從中學到好多廚藝知識同埋了解韓國嘅飲食文化。

韓國菜有個家常餸叫「炆牛筋骨」，呢個餸味道是甜甜的，甜味來自紅棗及水梨，韓國人會將水梨磨成蓉再混合其他醬料做成醬汁，今次我會簡化啲只係用醬油、冰糖、水梨蓉調味配牛肋條，糖分會令牛肋條嘅纖維軟化，肉質變得超軟熟，水梨又令餸汁無咁膩，我仲加咗爽口嘅蓮藕及馬蹄，令口感清爽啲。呢個餸做法唔複雜，而且超級好味又好送飯！

材料：

牛肋條....................1斤

韓國水梨.......1個300g

馬蹄.....................200g

蓮藕.....................200g

洋蔥.......................1個

冰糖.......................60g

青蔥段...................適量

醃料：

鹽....................1/2茶匙

韓國燒酒.............2湯匙

麻油....................2湯匙

調味料：

生抽....................3湯匙

黑醬油或老抽......1湯匙

做法：

1. 牛肋條洗乾淨用廚紙印乾水分，再切成一口大小，加入醃料拌勻醃15分鐘。

2. 水梨去皮去芯，用攪拌器打成蓉。洋蔥切絲，馬蹄如果大粒可以切半，蓮藕切片。

3. 材料準備好就開始煮，鐵鍋中火燒熱，落油先爆香洋蔥絲，再落冰糖及牛肋條。牛肋條煎香後，落調味料炒香。

4. 加入馬蹄、蓮藕，倒入梨蓉，加水至蓋過材料表面，冚蓋滾起轉細火炆大約一個半鐘。要留意水分避免燶底，醬汁最理想狀態係可以輕易掛汁。最後，撒下青蔥段就上碟。