聞西──苦瓜彭公鴨 強「醬」手下無弱兵

近排氣溫乍暖還寒，算係應驗咗未食五月糉，寒衣未入櫳呢句說話。其實大自然自有其法則，好似每個季節都有唔同嘅當造嘅食材，上星期去街市買餸發現好耐冇見嘅子薑，雖然子薑每年六至七月先至最靚，不過見佢都算肥嘟嘟，不如買嚟煮彭公鵝啦（鴨）。

彭公鵝係順德菜，相傳已經有超過800年歷史，話說有個叫「彭祖阿公」嘅人有日捉到隻鵝，之後用醋同子薑煮咗隻鵝獻畀玉皇大帝品嘗，結果玉帝食到舔舔脷，就問彭公隻鵝有幾多條毛，佢就答有880條（唔知係隨口噏定真係數過？），就係咁玉帝賜佢880歲命。故事就講到呢度，所以彭公鵝有象徵長壽好意頭嘅意思，順德人喺壽宴或者滿月酒都喜歡食彭公鵝，而每年農曆6月12日更會慶祝「彭祖誕」。

傳統嘅彭公鵝會原隻生碌，我緊係無咁嘅心機同時間啦，又唔知邊度買到鵝肉，以鴨代鵝毫無懸念。我喺超市買到乾淨又衛生嘅草鴨，有人會嫌草鴨肉質厚實，我就鍾意佢冇米鴨咁肥，至於用酸梅醬代替原食譜嘅甜醋，就好似西式煮鴨胸經常用到威士忌橙汁醬，帶啲果香嘅酸梅醬更能襯托到鴨肉嘅味道。另一樣調味料柱侯醬，都係中式炆家禽豬牛常用嘅醬，就有效去除肉臊味。咁點解要加苦瓜？因為「甜的吃、苦的也吃」囉，索咗醬汁嘅苦瓜口感一流，最好用大丁苦瓜。

材料：

草鴨....................半隻

子薑....................半斤

苦瓜......................2個

乾蔥頭..................3個

蒜頭......................8粒

蔥.........................1棵

花椒......................3粒

香葉......................2片

調味料：

酸梅醬...............4湯匙

柱侯醬...............兩2匙

冰糖..................1細嚿

醃料：

生抽...................2湯匙

老抽..................1湯匙

粟粉..................1湯匙

玫瑰露..............1茶匙

麻油..................1茶匙

胡椒粉.............半茶匙

做法：

1. 鴨件洗乾淨之後用廚紙印乾，然後落醃料醃半個鐘。易潔鑊落油將鴨件煎香至出油後盛起，記住要保留鑊中鴨油。

2. 準備乾蔥頭、蒜頭、蔥頭（蔥白）、蔥段（蔥綠），苦瓜切件，子薑去皮去芽後切厚片，八角香葉沖洗乾淨。

3. 中火用鴨油爆香乾蔥頭、蒜頭、蔥頭，加入調味料炒香，再落鴨件及子薑炒勻。

4. 加水至材料表面，落埋八角香葉，冚蓋滾起後轉細火炆50分鐘。落苦瓜件炆多5分鐘或至收汁，最後落鹽調味及加入蔥段。