聞西──黃金奶油三文魚

話說，我寫咗N年食譜，臉書都係得嗰一萬幾千粉絲，真係覺得好羞家，逐個逐個儲係難啲㗎喇。但好似煮食界近期被網民熱評嘅「上湯蟹柳浸白蘿蔔」，一味餸已街知巷聞（雖則係劣評如潮），邊個仲夠膽話揸鑊鏟冇機會出人頭地？

不吐不快，其實呢味「上湯蟹柳浸白蘿蔔」，真係唔係咁容易煮㗎，要煮到啲蟹柳好似碌木咁，係需要好有技巧先得，係唔係應該唔剝包住蟹柳嗰個膠袋先做到㗎？好欣賞佢將蘿蔔條同蟹柳層層疊得咁靚，見到都唔想食……

呢個世界已經變咗㗎喇！「買like」買到變（百）萬人迷，有時候真係好頂唔順呢個世界，乜都可以做假。好多年前我已經不時呼籲大家，盡量少用人造調味或者上湯，甚至因為咁得罪咗個「名廚」，搞到我「被unfriend」。老實講，放得入口嘅嘢，我點都要過到自己嗰關先會推介，由沙律菜叫人落雞汁，到今時今日叫人用上湯煮蟹柳浸白蘿蔔，睇吓大家反應幾咁熱烈就知咩事！

既然我自斷米路，只好繼續默默煮啦。今日會分享一個「黃金奶油三文魚」，一定難煮過蘿蔔蟹柳，不過大家乖乖留家抗疫，可以慢慢試、慢慢煮！呢個餸靈感來自白汁，今次加咗南瓜泥顏色更靚，最適合「汁人」，熱辣辣撈飯或者意粉都好得，蔬菜沾上順滑嘅汁小朋友更容易接受，呢個餸又係清雪櫃嘅好幫手，有乜落乜你話事啦，蟹柳都得㗎，呵呵～

材料:

三文魚200g
洋蔥50g
南瓜140g
乾蔥頭1個
薯仔120g
西蘭花50g
麵粉10g
牛油20g
水200ml
牛奶1盒240ml

鮮忌廉50ml

做法:
1. 南瓜及薯仔去皮隔水蒸10分鐘，薯仔備用，南瓜用湯匙壓成泥狀。

2. 洋蔥及乾蔥頭切粒落油炒香，當材料炒至軟身及金黃後，就可以落牛油略炒。隨後再落麵粉炒勻，然後加水、牛奶及鮮忌廉(記住用慢火呀)。

3. 開始微滾就落南瓜泥，不斷攪拌至質感順滑，然後落鹽調味。

4. 加入三文魚件及西蘭花煮3分鐘，最後落埋薯仔輕輕拌勻即可上碟，食之前灑上少少黑胡椒粉及辣椒粉，整色整水就攪掂。