聞西──潮汕味滿瀉！甜酸菜鮮魷粉絲

朋友少入街市，對好多食材都感覺新鮮，不時手舞足蹈指手畫腳，芥蘭菜芯都分唔清，笑死阿叔我。去到魚檔買魷魚，又誤認墨魚做魷魚，笑大人個口，即刻同佢惡補一下。

只要認住佢個外形就唔會搞錯：墨魚肥肥矮矮肉厚觸鬚多，魷魚身形扁長好似火箭咁。買墨魚又好，魷魚又好，最緊要睇佢隻眼就知新唔新鮮，最好揀眼仔碌碌嗰啲；其次就係身形，一定要夠挺身透透哋有光澤；最後就係用個鼻喇，如果你行到埋檔口聞到好大陣臭味，咁就千祈唔好幫襯。唔新鮮嘅魷魚真係好鬼臭，就算煮熟都會有陣臭味，咁就嘥料啦！

云云海產中我最鍾意食魷魚，魷魚就係有一種鮮味其他海鮮冇嘅，曬乾咗嘅魷魚味道會更加強烈。不過，有人怕腥，咁就可以試吓加鹹菜去煮，都有科學根據，醃菜中含有大量氨基酸可以辟腥提鮮，亦可以中和食物嘅味道。其實我真係好鍾意用醃菜做調味，例如我有個餸係用雪菜炆牛仔骨，好多朋友都驚訝味道原來咁夾！

呢個甜酸菜鮮魷粉絲煲好有潮汕味道，留意今次用嘅係甜酸菜，唔係鹹酸菜呀，甜酸菜只要用水沖洗一下就可以用，唔使浸水減低鹽份，粉絲用凍水浸軟就得。

材料:
粉絲100g
金針15g
魷魚1隻260g
大紅椒1隻
甜酸菜120g
蒜頭2粒
乾蔥頭1個
水200ml

調味料:
蠔油2湯匙
紹酒1湯匙
麻油2茶匙
胡椒粉1/4茶匙

做法:

1. 首先預備材料。魷魚清理內臟唔使去衣，直接切成魷魚圈，落少少粟粉撈勻、甜酸菜洗淨切絲、大紅椒切片、金針浸軟，另準備蒜蓉及乾蔥蓉。

2. 燒熱鑊落油，將甜酸菜、金針、蒜蓉及乾蔥蓉爆香。

3. 落魷魚及調味料炒勻，然後加入水分。

4. 水開始滾起就可落粉絲，用筷子同鑊鏟不斷炒，直至粉絲軟身呈透明。最後，加入紅椒片炒勻就搞掂，想粉絲乾身啲可以繼續炒，直至水分蒸發晒為止。