(荃灣葵青離島)手作教室 向緊張說不

在家說個不停的兒子，到了幼稚園卻不開口。80後三孩媽媽張嘉文（Carmen）四處尋求協助，後來在手作市集裏，看見孩子願意接近陌生人。這段經歷，讓昔日的銀行培訓講師開設手作教室，也開始培訓媽媽當導師，陪她們發展家庭以外的生活。

Carmen早於2011年已在中資銀行擔任內部培訓講師。她坦言，以前的自己較緊張，後來為照顧孩子離開全職工作，仍間中到機構和公司教授興趣班。

我哋都係想佢放鬆，不如畀佢任玩，總之安全就可以。 — Carmen

//佢教我點樣同小朋友溝通，（建議）搵個媒介令小朋友肯同人接觸。//

兒子讀幼稚園時，老師懷疑他有選擇性緘默症。Carmen四處找資料，在社工協助下找到言語治療師。「佢教我點樣同小朋友溝通，可以搵一個媒介，令小朋友肯同人接觸。」她也調整了自己的問話方式。「家長有時好緊張，會問今日學咗啲咩。

後來我哋第一句會問：『你今日開唔開心？』如果佢開口，就繼續傾；如果唔開口，就唔好追問。」疫情期間，Carmen到手作市集擺檔，丈夫帶兒子來玩。孩子雖然沒有開口，卻會用動作向鄰檔哥哥表示想參與。「開頭淨係同一檔玩，玩下玩下，又同第二檔玩。我就諗，係咪藝術可以令佢放鬆？」

紓緩情緒 助孩童交朋友

市集結束後，她與丈夫商量，在屯門租地方開設教室。「出面好多時係小朋友要跟住老師嘅方向，今日畫畫就畫畫。我哋都係想佢放鬆，不如畀佢任玩，總之安全就可以。」遇到家長擔心孩子做不來，她會鼓勵對方先讓孩子嘗試。

如今兒子已在學校交到朋友。Carmen轉述社工的分享：「佢會落去借玩具，同啲朋友玩。」孩子做手作時，Carmen也與媽媽們聊天。「有啲媽媽為咗家庭、為咗小朋友辭咗份工，冇咗自己。有啲收埋咗自己十年。」她開始培訓有興趣的學員當導師，再安排到機構實習，讓她們運用照顧孩子的經驗教班。

從絨毛娃娃到傳統工藝，讓學員按興趣選擇。

籌備項目支援低收入媽媽

教室搬到荃灣後，多了下班來玩的上班族。Carmen正籌備支援低收入媽媽的項目。「唔好淨係為咗屋企而放低自己，好多媽媽其實好叻。」現在偶爾仍忙到很晚，她卻說：「你係好開心咁度過，因為每一刻都同唔同人分享緊。」

Carmen培訓學員成為導師，鼓勵把所學帶到社區。

【絨毛娃娃紮作工藝 兩大教學熱點】

絨毛娃娃是Carmen課堂上受歡迎的手作之一。把內藏鐵線的毛條屈曲、扭轉，便能做出不同造型。「大人、小朋友都好鍾意，而且成本比較低，媽媽自己應付到。」她說，學會後可以在家製作出售，也可嘗試教班。

近年，Carmen亦投入非遺文化技藝教學。她本身喜歡中國文化，留意到不少老師傅年紀漸長，卻少有年輕人接棒。當中，她尤其喜歡紮作：「唔係拎起支竹就做到，真係要有師傅教你點樣劈竹、點樣紮。」課堂除了教做法，也會講技藝的來歷。「好多小朋友未必知道背後嘅文化，點解會有呢件嘢出現，我哋想同佢哋講多啲。」

兒子自小喜歡畫畫，成為親子溝通起點。