天氣轉涼打邊爐 四大錦囊免墮致肥陷阱

入秋後，天氣開始轉涼，相信大家一定好想打邊爐。不過，好多人都好擔心，食得太多火鍋搞到體重急升。究竟打邊爐的同時，有無乜有用方法可以一家人食得健康啲？唔想做肥仔肥妹，你就要知道以下事項！

錦囊1
少食加工肉類

午餐肉、芝士腸、蟹柳等等加工製肉類，都是大人細路喜歡的食物。然而，這類經過加工的肉類多含有添加劑，鈉質含量亦較高。建議各位打邊爐時還是選用新鮮的肉類，尤其是老人家和小童都盡量避免食用高鈉高脂的食品。

錦囊2
肉菜宜分開煮

大家總覺得油炸食物，好似響鈴、炸魚皮、生根放入湯內灼過，就會變得不油膩。可是，大家都忽略了煮過油炸或脂肪食材後，火鍋的湯水都會變得非常油膩。所以，打邊爐最好分成兩邊鍋，一邊煮低脂肪的食材，例如瓜菜、烏冬等；另一邊則煮肉類、海鮮等，避免蔬菜類多吸收油份，增加脂肪含量。如果不能分開煮的話，建議留意一下飲食次序，先食蔬菜，再食菇菌、海鮮、肉丸，最後才食帶脂肪的肉片。

另外，家長都會提小朋友食多條菜，別掛住狂食肉。不過，蔬菜其實在鍋內都容易吸油。有葉的蔬菜至為吸油，其次就是有葉有莖的，最後是瓜類和根莖類的。而芋絲可以算是打邊爐恩物，非水溶性纖維較多又不容易吸收油份。

錦囊3
湯底最好自製

湯底方面，可以揀選清湯，避免油份高的湯底，例如沙嗲、麻辣等。另外，坊間有許多便利湯包，但鈉含量高。其實，自製清湯十分容易，只需將一些帶甜味的蔬菜，例如番茄、粟米、南瓜、冬菇、白蘿蔔等，預先放入鍋中煮熟，就已成清甜的湯底，而蔬菜煮腍後亦好適合小朋友進食。

錦囊4
五榖類不可少

打邊爐最忌做食肉獸，而忽略五穀類食物。謹記均衡飲食原則，五榖類是正餐，應佔整體熱量不少於一半。大家打邊爐時不妨揀選含有豐富澱粉質的食材，例如粟米、粉絲、烏冬、年糕、非油炸拉麵等。另外，大家打邊爐時一定會飲啤酒汽水，但小心攝取過多卡路里和糖份，忍忍口以清茶、竹蔗水或無糖可樂代替吧。