聞西──酥炸蝦球 用蛋白醃過更脆

香港人真係好忙，之前忙食龍蝦，近排就忙食菠蘿，錯錯錯！應該係鳳梨至啱，一直都以為菠蘿同鳳梨只係香港、台灣唔同嘅叫法，反正都係菠蘿唔使分得咁清楚啦，但原來真係兩樣嘢嚟，為免俾人話指鹿為馬，不如一齊睇下佢哋有乜唔同啦！

從外皮講起菠蘿同鳳梨真係好鬼似，不過睇真啲菠蘿嘅皮係黃色嘅，而鳳梨就黃中帶綠。其次可以留意頂部嘅葉，菠蘿嘅葉係有鋸齒狀，相反鳳梨就冇。跟住再講一個分別，就係喺切開之後，兩者果肉都係黃色，不過鳳梨啲釘比較淺，所以唔使好似菠蘿咁螺旋形去釘，亦都唔使浸鹽水就食得，唔會搞到「口痕」。我覺得鳳梨比較清甜，味道冇咁濃，感覺台灣嚟嘅都係溫柔啲嘅，哈哈。

自從買咗個開菠蘿神器之後，開菠蘿同鳳梨變得好簡單，雖然唔係成日用，就當買個方便都好啦！今次會整鳳梨蝦球，用新鮮或者冰鮮蝦都可以。由於要油炸，蝦仁必須要印乾水，用蛋白醃蝦身會更滑，炸起嚟都會更酥脆，記得留番個「鳳梨蓋」，用嚟擺盤真係一流！