聞西──白苦瓜烏雞湯 滾埋茶樹菇方自賞

近排公司有新project，工作量以倍數增加，人手呢就梗係冇得加啦。呢個時候個個都話有份工就要阿彌陀佛感謝菩薩，所以呻下都好似有罪咁，惟有默默咁做，日日朝八晚十成個人散晒，office嘅氣氛又變到好緊張，睇怕大家壓力就嚟爆煲！次次同其他濕滯部門同事講完電話都爆晒粗，炆憎到連自己都覺得唔係好妥。

就趁週末滾個湯下下火，夏天當然係以滾湯為主，老火湯太聚火，而且煲幾個鐘頭湯，屋企嘅溫度將提升更多，呢個時候真係可免則免。我嘅滾湯公式好簡單，肉+瓜果蔬菜+乾嘅菇，滾過湯嘅肉同瓜果菜其實已經係一個餸，亦可以做湯飯。如果想個湯更香，落少少乾嘅香菇就得，姬松茸、牛肝菌、茶樹菇都可以，真係香到爆晒燈！
白苦瓜同普通苦瓜一樣有清熱解暑功效，最大分別係水分比較多，而且因為少咗葉綠素，所以食嘅時候係冇咁苦㗎，甜度都會感覺高啲。話時話，我好掛住台灣蜂蜜白苦瓜汁呀！今次用咗烏雞，由於比較少油對夏天嘅腸胃都會好啲。半個鐘頭就飲得，湯水入口甘甜，飲完成個人舒服晒，下個禮拜繼續努力啦！大家加油呀！

做法 :

1. 茶樹菇略浸軟，然後切走末段帶泥部份，千祈唔好浸太耐，否則菇味會大減，五分鐘就可以。

2. 烏雞切件先飛水，煲完個湯就會好清。

3. 白苦瓜切件，連同烏雞、茶樹菇及薑片全部放入煲裡面，跟住加一公升水冚蓋。中火滾起後轉細火，煲半個鐘頭就可以，最後落鹽調味。