聞西──麻婆用冬瓜 令無飯生變飯桶

五月未過已經日日三十幾度，呢個夏天究竟可以有幾熱呢？朝頭早行去搭巴士返工，個口罩已經濕鬼晒，黏住塊面好唔舒服呀。我覺得香港真係好適合輕裝返工，反正好多工都唔使見人，喺公司著T恤短褲都不知幾爽，工作效率一定提升好多啦。不過，香港啲老闆好少咁細心咁有人情味，有啲公司連著乜鞋都要管，你估我哋打工仔係奴隸咩！

炎夏真係要多做定消暑功課，除咗多食西瓜消暑之外，食冬瓜都係我嘅不二之選。以前阿嫲夏天都經常煲冬瓜湯，仲要連皮帶瓤一齊煲話最消暑喎。嗰陣時冇咩嘢叫「男人的浪漫」，我最鍾意大大件冬瓜炆火腩，好鬼好送飯。前人教揀冬瓜要用手拍吓佢，或者輕按瓜肉唔要太腍嘅，但係喺菜檔老闆監視之下應該冇乜可能做到，大家只可以用肉眼分辨。最緊要呢，就係瓜皮有層白色粉末嗰啲會甜啲，瓜肉就要夠白，一見少少黃及透明就係唔新鮮喇。雖然宜家市面上有唔同種類嘅冬瓜，不過煮嘢煲湯我都係鍾意深綠色嘅大冬瓜。

麻婆豆腐大家食得多，今日做個少改變，用冬瓜代替豆腐。冬瓜天生味淡，而且吸味能力超強，最啱配一啲濃味嘅食物。由於想有入口即溶嘅口感，我只用中間比較腍身嘅，切咗近皮嘅瓜肉，可以留番做冬瓜湯飯或者滾湯，咁就唔會嘥嘢食啦。加埋荷葉、蓮子及夜香花，成個餸有種好夏天嘅感覺。

做法：

1. 準備各樣材料：冬瓜切粒，蓮子浸軟去芯，免治豬肉落調味料（A）醃10分鐘，荷葉用滾水浸軟再剪成適合大小，並準備乾蔥蓉及蒜蓉，乾辣椒及芫荽切碎，夜香花剪去花托。

2. 中火熱鑊（或鍋）落油，將免治豬肉整成餅型。先煎香一面，反轉再煎另外一邊時可以落埋乾蔥蓉、蒜蓉及調味料（B），煎到啲肉金黃香脆之後，就用鑊鏟炒碎。

3. 落冬瓜粒及蓮子炒勻，加入150至200ml水煮五分鐘就可埋芡，加上辣椒碎、芫荽碎及夜香花拌勻即可熄火，將荷葉放在深碟，然後上碟。

小貼士：

1. 冬瓜有好多水份，所以唔使落太多水。

2. 免治豬肉一定要煎到香脆先好食㗎。

3. 乾蔥蓉及蒜蓉一早落好易燶晒，等肉煎出豬油先落，就會特別香又唔會燶。

4. 乾荷葉好脆，一定要用滾水浸軟先可以剪，否則一定碎晒。

5. 經常有人問我：「埋芡要落幾多生粉水？」其實，慢慢加到啱自己心水嘅濃稠度就可以。