聞西──打針放工都補番下 嘆肉骨茶

近排見親朋友都被問「打咗針未？」，我例回：「打咗喇」。之後，就會有一連串嘅問題：「打邊隻」、「打咗幾耐」、「有冇副作用」等等。我明㗎，大家都係人，打針喎，打啲嘢入身體喎，又見到好多個案打完針有唔同程度嘅反應，點會唔擔心呢？好多朋友都係諗住睇定先，佢哋覺得「好似冇乜急切需要打針」，「為抽獎抽樓去打針？咪講笑啦，有咩貴得過條命呀。」

之不過，如果人人都係咁諗，社會就會遲遲都做唔到群體免疫，疫情只會反反覆覆無了期咁持續。我決定打針，第一係為咗我經常見面嘅好朋友，聚會食飯除低口罩都會安心啲，第二就係公司嘅同事，日日朝九晚九一齊做嘢，真係唔想自己累街坊，最後我覺得係公民責任。宜家好多公司都會資助僱員先做身體檢查，幫助大家決定打唔打，呢啲比起抽獎嚟得仲實際。講到尾，自願好過強迫，明就會明啦！

打完針真係要補一補（好明顯係藉口）。有時多嘢做個人好攰，我都會煲個肉骨茶補補，肉骨茶嘅中藥湯包，主要材料有當歸、玉竹、當參、杞子等等，再加埋豬骨及蒜頭。話說以前南洋嘅苦力，朝頭早都會飲肉骨茶補充體力，蒜頭又可以增強抵抗力，而且有去濕作用，所以夏天飲都ok㗎。今次我就用咗急凍嘅豬仔排，產自西班牙，500g都係賣$78，好抵喎。將佢捲埋做到個皇冠咁，真係勁過出街食嗰啲！

材料:
豬仔骨或一字排500g、蒜頭1至2個、冬菇6隻、肉骨茶湯包2個（通常1包有2個），芫茜適量，油炸鬼或者響鈴適量、水1.5公升

調味料:
生抽1湯匙、蠔油1湯匙、黑醬油1茶匙、胡椒粉少少、鹽少少

做法:
1. 冬菇浸軟，肉排在骨與骨之間切一刀，不過唔好切斷，跟住用棉線綁住做成皇冠形，之後出水備用。

2. 蒜頭連皮洗乾淨後切去頂部，慢慢火煎至金黃，煲完嘅蒜頭會更加香甜。

3. 用一個比較深嘅細鍋，放入肉排、蒜頭、冬菇及湯包然後加水，滾起之後轉慢火煲一個鐘。

4. 加調味料再試味，上菜前喺「皇冠」插上一大堆芫茜，可配油炸鬼或者響鈴伴食。