聞西──黃皮蒸排骨 唔想汁輸落粟粉

世界發展得好快，有時真係快到令人跟唔上，其中一個就係我。有時覺得自己停留咗喺一個年代，一個我哋好珍惜好留戀嘅年代，到宜家我仲聽緊梅姐、哥哥、陳百強嘅歌。人去到某個年紀，就會好怕熟悉嘅人、事、景物、味道逐漸消失，好似經典嘅粵菜餐廳買少見少。幸好仍有人默默耕耘守護住呢份傳統味道，我認識嘅中環「蛇王芬飯店」老闆娘Gigi，就係其中一個有心人。

百年老店去到佢手中已經係第四代，本來可以做個少奶奶得閒嘆下茶，但係為咗家族傳承，守護呢個招牌、守護傳統粵菜文化，多年來落手落腳經營。即使疫情下壓力大增，佢仍然不斷應變不斷嘗試毫不氣餒，呢啲先叫做香港精神嘛！「蛇王芬」除咗
蛇羹頂呱呱，傳統小菜都做得非常出色。近排天氣炎熱，最鍾意佢哋大大個冬瓜盅，瓜肉超厚、料足湯甜；另一味「山楂梅子荔枝炆乳鴿」就超級好味，梅子、荔枝味道清新，調味非常出色。講講吓，令我諗起另一個以生果入饌嘅菜式：黃皮排骨。

黃皮大約七月開始當造，再過幾個月之後就要等下年先有得食。俗語有話：黃皮樹了哥唔熟唔食。唔熟嘅黃皮非常酸澀，熟咗之後就會變得酸中帶甜，我覺得味道有啲似桔仔，但更加香！食厭咗梅子蒸排骨嘅話，可以試下用黃皮代替，冇咁酸之餘仲多咗份果香，鍾意食腍身嘅排骨可以用唐排，唔鍾意噒骨嘅就用肉排啦。蒸排骨最緊要落粟粉，啲汁先唔會水汪汪。另外醃排骨要先畀個底味佢，然後至再加醬，最後要用中大火蒸15分鐘，啲肉就唔會嚡熠熠喇。

材料 ：
排骨250g
豆卜4至5粒
紅椒適量

醬料 ：
麵豉醬1.5湯匙
蒜頭2粒剁蓉
黃皮約15粒
糖1茶匙

醃料：
生抽及紹酒各2茶匙
麻油1茶匙
花生油1湯匙

做法 ：