聞西──冬瓜綿花雞 落薑辟腥味可大啖咬

機場從來都係一個充滿悲歡離合嘅地方，疫情關係你同我都好耐冇去過。不過，近排睇新聞又見到機場變得人頭湧湧好熱鬧，唔係因為開關可以再去旅行，而係多咗人選擇移民，一幕幕道別嘅畫面真係令人眼濕濕。移或者唔移，純粹係個人決定，我身邊都有啲朋友選擇移民，大部分都係為咗子女將來升學，真係好佩服佢哋嘅勇氣，要去到一個陌生嘅地方從頭開始。我有時去旅行耐少少，都會掛住香港呢個屋企，掛住杯奶茶、掛住碗雲吞麵、掛住去茶樓嘅一盅兩件。

講到飲茶，有款點心我必定會點嘅，就係綿花雞。呢個點心本來就係一味粵式小菜，後來因為太過受歡迎，所以茶樓就將佢變成點心。所謂「魚肚」其實唔係「魚嘅肚」，而係「魚鰾」。魚肚本身冇乜味道，炸過之後好似豬皮咁變成吸汁高手，所以成碟綿花雞最好味嘅一定係件魚肚。一般喺街市買到嘅都係沙爆魚肚，唔係咩貴價貨，五十蚊已經有幾條，貴啲嘅就係鹽爆魚肚，鹽爆成本高好多，當然質素都會好好多冇乜腥味。大家睇餸食飯囉，我食沙爆嘅一樣滿足，用薑片出出水就可以辟到魚肚啲腥味。去茶樓食綿花雞一碟得兩件「綿花」，唔夠分之餘又到喉唔到肺，今次自己整，咁就可以食過夠本啦！

材料：

沙爆魚肚40g
去骨雞髀肉200g
冬菇適量
冬瓜1斤
蒜頭3至4粒
薑幾片

醃料：
生抽1湯匙
生粉1湯匙
油1湯匙

沙茶醬1湯匙
紹酒1茶匙
糖半茶匙

調味料：
蠔油1湯匙
油1湯匙
胡椒粉1/4茶匙

做法：
1. 魚肚預先浸軟洗淨切件，水滾落2至3片薑加入魚肚，熄火浸半個鐘撈起沖水，擠乾水份備用。

2. 雞髀肉落醃料及蒜蓉醃半個鐘，冬菇浸軟去蒂，落調味料及薑絲撈勻。

3. 冬瓜環去囊去皮，先用中火蒸15分鐘。

4. 將魚肚、冬菇及雞髀肉撈勻，放在冬瓜環上再蒸15分鐘，最後落少少麻油就食得。

小解說：

傳統版本冇冬瓜㗎，今次都係試吓，其實冬瓜會出水，某程度上碟餸味道會淡咗，但感覺上又豐富啲，大家可以試吓唔加冬瓜嘅。另外，今次加咗沙茶醬調味會更香口，你知啦，喺屋企整嘢我一定唔會用味精雞粉雞湯雞汁㗎嘛！