聞西──沙薑炒龍躉 配花生芽收鑊滿滿

老實講，我自認係老一輩嘅人，對好多新事物都有啲固執睇法，就好似煮飯我都係喜歡明火多過用電磁爐（除咗煲湯）。雖然有廚師朋友話用廚房嘅電磁爐都可以好有鑊氣，不過唔關我事啦，而且我永遠掌握唔到究竟電磁爐個溫度點計算，1至10度即係幾熱呢？最弊冇一個統一嘅計法，朋友話用得多就會掌握到竅門，呢啲咪叫「廢話」囉！哈哈！

最近睇咗一個電視節目《納米無明火》，令我對電磁爐有少少改觀。個節目由谷德昭主持，每集探訪一個納米樓住戶，上門煮啲嘢食同屋主邊食邊傾。由於大多屋仔細細，一定冇可能明火煮食，所以佢會專登去學一啲無明火都煮到嘅菜式。成個節目好溫柔體貼好有誠意，時有感動時有幽默，最重要係展現到香港人嘅堅毅，地方細但志很大，能屈能伸咁去適應呢個世界。節目已經播完，大家可以上網重溫。

做人要有志氣，小炒最重要係有鑊氣，大牌檔嘅小炒王就係一個好例子。今次小炒王嘅主角係喺超市買嘅龍躉魚柳，已經去骨非常方便，切厚片炒嘅時候就唔會咁易散。我用咗沙薑鹽焗雞粉做調味，辟咗腥味之餘仲好惹味，其實沙薑粉配海鮮真係好夾㗎！不過，要留意每個牌子嘅沙薑雞粉鹹度都未必一樣，建議首先試味調整份量。至於配菜就適合揀啲爽口快熟又唔會出水嘅，今次用咗近排大熱嘅花生芽，我就覺得好正喇！

材料：

龍躉魚柳200g
花生芽100g
粟米仔100g
韮菜80g（或用蔥代替）
薑幾片
紅椒片適量
紹酒1湯匙
麻油少少

醃料：

粟粉1茶匙
沙薑雞粉2茶匙
油2湯匙
胡椒粉少少

調味料：

豉油1湯匙
沙薑雞粉1湯匙

做法：
1. 魚柳洗淨，用廚紙吸乾水份後切片。沙薑雞粉以油拌勻，加入切好嘅魚片醃15分鐘，煎至金黃備用。

2. 準備好其他材料。

3. 燒熱鑊落油爆香薑片，然後落花生芽及粟米仔炒1分鐘。之後，加入韮菜、紅椒片及調味料，再炒1分鐘。

4. 放魚片略略炒勻，之後鑊邊落紹酒焗多1分鐘，最後撒少少麻油就搞掂。