聞西──印尼串燒 耐烤耐焗竹籤先浸水

睇奧運有時候真係好似睇鬼片一樣，好想睇但又唔敢睇，尤其輪到香港運動員出賽，大家都肉緊到下一刻就心臟病發咁，好幾次我索性熄咗電視或者轉台冷靜一下。感動呢幾個禮拜大家都好團結咁支持香港運動員，姑勿論有冇獎攞其實都好值得我哋尊重。不過，總有啲好唔乖嘅人，最深刻嘅係中華台北隊羽毛球選手戴資穎回應網民批評：「站在場上的不是你，覺得我失誤太多，可以不要看我打球，謝謝！」就係囉，你一句說話就抹煞咗人哋多年嘅努力，好唔應該囉！

同朋友傾開偈，佢話家中嘅印尼姐姐都有睇奧運，有次甚至叫外賣同姐姐一齊食，等佢可以專心睇電視。就係印尼羽毛球女雙奪金嗰晚，電視影住佢哋贏咗之後，主僕一齊崩潰式大喊，大家都感動到眼濕濕，第二日姐姐就煮咗餐印尼餐慶祝！

上星期啱啱買咗個家用手提燒烤爐，仲係明火嚟！插支打邊爐嘅石油氣仔就得，於是即刻用嚟燒肉燒泰國大頭蝦，真係好有街頭風味。然後，再嚟整印尼串燒效果都唔錯，個沙嗲醬其實好易整，印尼雜貨店有沙嗲磚賣，主要用熱水開溶再加調味料就可以。我亦另外加咗啲菠蘿蓉等個醬香甜啲，食完又冇咁容易上火。如果怕油煙，就可以學我咁將個烤爐放喺抽油煙機下面，開着個抽油煙機就唔怕成屋都係味啦。另外，竹籤要預早浸水，咁就冇咁容易燒爛。

材料：
雞扒1塊
任何沙律菜適量
竹籤6枝

沙嗲醬材料：
印尼沙嗲磚半件（100g）
水150ml、乾蔥頭2個切片
罐頭菠蘿1片（唔要都可以）
椰漿2湯匙
甜豉油2湯匙
鹽少許

醃料：
蒜蓉2湯匙
油2湯匙
豉油1湯匙
鹽1/2茶匙
胡椒粉1/4茶匙

做法：
1. 雞扒切件落醃料，醃幾個鐘以至一晚等佢入味，然後用浸過水嘅竹籤串好。

2. 沙嗲磚切成小粒，放小鍋加水慢火煮溶。之後加埋乾蔥片、菠蘿蓉、椰漿及甜豉油，攪勻之後再落鹽調味，如果太杰就加啲水調節一下啦。

3. 開爐慢慢將雞串燒燒至金黃，途中要不斷翻動雞串，留意盡量避免燒到竹籤。如果家中冇烤爐，可以用焗爐代替，200度火力大約焗15至20分鐘。每個爐火力都唔同，大家可以按情況調整。