聞西──雞油菌燴豆腐 帶來杏馥味道

話咁快又嚟到農曆七月，即係俗稱嘅「鬼節」。以前細個唔知驚又唔識死，覺得燒街衣好好玩，為咗「玩火」，我好俾心機去學習摺元寶，連阿嫲都讚我好有天份，哈哈！去到七月十四嗰晚重頭戲，帶齊元寶蠟燭香等祭品出發，當時滿街都係燒街衣嘅氣味，四處火光熊熊氣氛的確好詭異。不過，小手拖著嫲嫲隻大手出夜街冇有怕，尤其一到點火嘅時候就更加興奮，細路仔就係咁天真。

大家有冇留意祭品一定有豆腐、芽菜、白飯等等嘅食物？原來相傳鬼魂喺地府係唔可以食嘢㗎，所以食物未放到入口已經會化為灰燼，好可憐！前人之所以揀豆腐、芽菜等做祭品，因為佢哋水分較高無咁容易被焚化，餓鬼先有機會填飽個肚。另外，亦有人話祭品唔可以太豐富，怕佢哋樂而忘返喎。至於燒街衣，係為咗鬼魂有得食又有得著，屬於對一眾亡者嘅心意啦。

雞油菌(chanterelle)

為咗「應節」，我特別設計咗一道豆腐菜式：蝦子雞油菌燴豆腐，雞油菌(chanterelle)形狀好似朵花仔咁，因為顏色鮮黃就俾人叫咗做雞油菌，完全冇雞味㗎。反而呢，就帶少少杏香味，香氣獨特濃郁，平時我鍾意用嚟蒸魚，今次配豆腐一樣咁好味。高檔少少嘅超市會搵到乾貨雞油菌，新鮮或者急凍貨香味反而冇咁濃郁。雞油菌比較多沙，用清水浸泡30分鐘，之後要泡洗幾次直至盤底冇沙為止。至於浸菌嘅水，就要留起備用，網上面話雞油菌有明目利肺、清腸益胃、預防視力下降等等功效，而我淨係知到好好味就已經足夠！

材料：
豆腐2件（我用咗日本木綿豆腐，硬身啲炸嘅時候比較容易控制，如果唔想炸嘅，就用布包豆腐都可以）、雞油菌50g、蒜蓉2湯匙、芫荽碎或蔥粒適量、蝦子約1湯匙、浸菌水300ml

調味料：
蠔油11/2湯匙
豉油1湯匙
紹酒1湯匙
麻油2茶匙
胡椒粉1/4茶匙

做法：
1. 雞油菌用水洗一次，然後浸泡30分鐘，浸菌嘅水要留起，之後要泡洗幾次，直至盤底冇沙為止，然後揸乾水備用，預備蒜蓉及芫荽碎。

2. 豆腐切厚件用廚紙印乾，落油鑊炸至金黃。

3. 燒熱鍋落油爆香雞油菌及蒜蓉，贊酒，然後加入浸菌水及其他調味料煮滾。

4. 放入豆腐件煮至略略收汁，落芫荽碎、埋芡，最後撒上蝦子。