聞西──咖哩黃金三角 鍾情夠薯嘅內餡

一年容易又中秋，唔使我講大家都知，因為排山倒海嘅月餅廣告一開電視就睇到。舊時嘅世界買月餅唔係咁㗎，我記得阿嫲會做月餅會，早買早享受折扣，月月去供又唔會咁肉痛，而且仲有好多豬仔餅送。嗰陣時月餅仲好正常，一般都係蓮蓉月餅，單黃雙黃三黃咁，記得有啲係冇黃嘅，好恐怖囉！後來先出白蓮蓉，或者咩七星伴月呢啲噱頭嘢。

宜家啲月餅梗係唔同晒啦，真心講似甜品多過似月餅。前排去美食博覽有驚人發現，竟然有一款叫「威靈頓月餅」，顧名思義係以英國威靈頓牛柳為靈感，用酥皮做到外形「好似」月餅，裡面係血淋淋嘅牛肉。最搞笑係呢款月餅唔可以即刻食，因為其實佢只係一個急凍半製成品，返到屋企仲要自己焗，食之前一晚要解凍咁，仲要控制好焗嘅時間同火候，你話呢啲係唔係叫做走火入魔呢？

我食月餅都係為咗個鹹香蛋黃，同樣食咖哩角都係為咗啲薯仔餡。今次分享一個咖喱角食譜，做法係我煮咖喱雞翼時諗到嘅，話說每次都好快食晒啲雞翼，淨番啲薯仔好可憐，就諗不如試吓搓成蓉做咖喱角啦，點知好味到冇朋友！留意番我係用馬來西亞嘅咖喱醬，加埋泰國冬蔭功嘅香料，嗰皮可以用春卷皮，高班嘅同學可以買現成酥皮，自己整酥皮就唔使預我喇，哈哈！

材料：

春卷皮...............................................10張
薯仔...................................................400g
急凍青豆............................................100g
泰國冬蔭功香料（唔要青檸）.............1包
椰醬....................................................80ml
蒜頭.....................................................4粒
乾蔥頭.................................................2個
馬來西亞咖喱雞醬.............................100g
蛋漿....................................................適量

做法：
1. 薯仔去皮切件，青豆解凍，並處理好冬蔭功香料。

2. 易潔鍋慢火燒熱落油，落香料及蒜頭乾蔥頭慢慢炒香。然後落薯仔略炒，再落咖喱醬炒香，之後加椰漿及水至材料表面，煮滾後煮10至15分鐘至收水就熄火。

3. 取出薯仔壓成薯蓉、落鹽，為鍋裡面嘅咖喱汁調味，再加埋青豆拌勻，留意薯蓉唔可以太濕，否則會整腍啲春卷皮。

4 春卷皮一開二，邊位搽蛋漿，放約一湯匙薯蓉，然後對角摺到尾，就會係一個好完美嘅三角形咖喱角，記住按壓一下邊位。最後，用慢火炸至金黃色就趁熱食喇。

溫馨提示
春卷皮好容易變乾變脆，唔用嘅時候可以用濕毛巾冚住先。