聞西──掏空裡面 南瓜鯪雨肉布甸

今年中秋假啱啱喺星期三，請兩日假就可以自製一個五天假期，Yeah！放假前輕鬆同同事傾偈講起買燈籠，佢話小朋友已經長大，好耐冇買燈籠喇，關事咩？中秋節冇燈籠點得㗎。記得細個住公共屋邨，中秋節真係超有氣氛，周圍都掛滿燈籠，又有好嘈嘅中秋晚會，仲有煲蠟呢啲唔應該做嘅危險活動。食完飯之後，小朋友都會得到一個難得出夜街玩嘅機會，通常約埋隔離鄰舍嘅大哥哥姐姐，拎住燈籠去公園玩。

小朋友拎住各式各樣嘅燈籠，就好似選美大賽一樣，大家覺得自己個燈籠最靚，有時唔忿氣仲會出陰招燒咗人哋個燈籠，我細個真係好曳㗎！哈哈……我最鍾意用玻璃紙做嘅坦克車燈籠，其次係白兔仔燈籠，因為公司喺上環，每年我都會行去西營盤「雀仔橋」買燈籠，舖頭外邊掛滿各式各樣嘅燈籠好靚呀，宜家已經變咗做IG打卡熱點。

其實，今次分享嘅餸同中秋節一啲關係都冇，反而好適合十月尾嘅萬聖節Halloween，因為佢係一個用魚漿做嘅南瓜布甸，泰國人會將魚肉剁成蓉，加啲椰漿、紅咖喱、檸檬葉等調味攪成魚漿，放入蕉葉做嘅碗仔蒸熟，上面再淋啲椰漿，好滑好辣，用嚟撈飯一流，今次用咗南瓜仔做容器，效果更加吸引。

材料：
南瓜仔2個、鯪魚肉4両、檸檬葉2至3片、紅辣椒1至2隻、芫茜適量、椰漿100ml、水30ml

調味料：
魚露...................................1湯匙
糖.......................................1茶匙
胡椒粉............................1/4茶匙

做法：
1. 準備檸檬葉幼絲、紅辣椒粒及芫茜碎。

2. 鯪魚肉先加入椰漿及水攪至順滑，然後加入調味料，並將步驟（1）嘅材料拌勻備用。

3. 南瓜仔切去頂部，用匙羹刮走瓜肉做成南瓜碗，𥚃面搽上粟粉。

4. 將魚漿倒入南瓜內，再用匙羹壓擠魚漿，整走裡面嘅空氣，之後隔水蒸半個鐘即可。

小貼士
留意番，如果即刻食魚肉比較削，所以可以攤凍一陣，等魚肉收緊少少，口感會好啲㗎。