聞西──黃芽白油揚豬肉鍋 層層咀嚼聲悠揚

自從買咗架錢七車仔之後，每個Weekend都會去商場大型超市入貨，咁又真係幾方便嘅，買得多可以直接推架車仔去停車場，除此之外都係貪小便宜啦！商場買滿$800蚊就可以免費泊車，所以去超市就好似上數學堂咁，不斷計下夠唔夠數攞泊車優惠，其實停車場都係24蚊一個鐘咋，連我自己都唔明白點解要咁緊張，哈哈！

行過凍肉櫃，見到60幾蚊一包火鍋用嘅黑毛豬肉片，價錢好合理喎，用嚟煮泡菜豬肉鍋就最啱，即刻買！跟住又見到油揚，10蚊有幾片好抵食。油揚即係日式炸腐皮，係日本嘅傳統食物，通常會用嚟煮湯，又或者做福袋。最近喺網上見到個簡單又創意新嘅食法，就係將油揚切開兩半，倒隻生雞蛋入去，然後用牙籤將油揚封口，再同公仔麵一齊煮，15分鐘之後就變成流心蛋油揚，呢個真係要試吓。最後買咗個大黃芽白，貪佢好襟擺，就算平時放工唔得閒買餸，屋企都可以隨時有菜食啦。

今次教大家一個層層疊嘅黃芽白油揚豬肉鍋，睇住啲菜、肉、油揚一層一層相隔，整齊排喺鍋裏面的確好治愈，呢個做法有啲似法式燉菜，只係略施小技就可以令賣相加分！今次用咗我最鍾意嘅鰹魚湯汁，湯頭天然清甜，大家可以隨自己喜歡轉用其他湯汁㗎。

材料：

大黃芽白...........................半個
火鍋豬肉片..................約400g
油揚...........................2至3片
鰹魚湯包............................1個
鰹魚片...............................適量
薑......................................幾片
日式醬油........................2湯匙
鹽......................................少許
適量飯素或蔥花作裝飾

做法：
1. 先準備湯汁，500ml水加入鰹魚湯包及鰹魚片，慢火煮10分鐘，落日式醬油調味。

2. 大黃芽白只取原整大葉大約七片，油揚剪開一分為二。

3. 一層黃芽白，鋪上一片油揚、再舖一層火鍋豬肉片，重複疊高三至四層，之後砌齊整，再切三等份，然後整齊排喺鍋中。餘下嘅菜和肉，可以按以上做法處理直至材料填滿個鍋，並撒少少鹽喺材料上面。

4. 倒入湯汁，滾起後轉慢火煮15分鐘，食之前可以撒上飯素或蔥花裝飾。