聞西──獅子山下變通 海南雞飯冬瓜湯

作為一個打工仔，返工望打風放假實在正常不過，不過有冇得放假都仲要睇個天……文台先得。連打兩個風，第一個風「獅子山」，三號風球之下已經橫風橫雨，大家仲要返工返學，有幾狼狽就唔使我講，戶外工作嘅人要繼續開工仲慘，結果搞出人命，大家就怪罪天文台。其實，最應該要怪就係怪嗰啲無良老闆，惡劣嘅環境之下好應該暫停開工，正所謂制度、數據都係死嘅，我哋嘅社會可唔可以有多啲同理心、有多啲愛心呢？

結果第二個風「圓規」滿足咗大家嘅期望，連同重陽節假期放兩日假。風球前大家都搶住去街市超市掃糧，提早收工嘅我去到超市嗰陣，見到個菜架已經空空如也，反問自己：「唔通打風先嚟食菜」？立即轉戰街市，見到半隻雞如獲至寶，一於整海南雞飯啦！順便買斤冬瓜用浸雞嘅水煮湯，冇浪費㗎。

材料：
雞半隻、冬瓜1斤、飯2杯

浸雞材料：
班蘭葉2至3塊、南薑1小嚿、芫荽1扎、蒜頭5粒

黃薑飯材料：
香茅3枝、檸檬葉幾片、南薑1小嚿、黃薑粉1茶匙、浸雞上湯適量、鹽1茶匙

自製辣椒材料：
青檸1個、芫荽頭2條、紅椒2隻、蒜頭2至3粒，熟油適量

做法：

1. 整海南雞最重要嘅步驟就係浸雞，準備湯煲加水啱啱夠浸過隻雞就得。等水滾時可準備浸雞材料，當中班蘭葉要好似扭毛巾咁扭佢先容易出味，水滾就落浸雞材料，煲5分鐘就熄火。至於浸雞時間，就大約用45分鐘，基本上一定會熟。

2. 跟住用電飯煲煮黃薑飯。香茅用刀柄錘幾下再切段，連同檸檬葉、南薑片、鹽及黃薑粉，加入洗乾淨嘅米放入電飯煲，再加適量浸雞嘅湯，就可以撳掣煮飯。

3. 跟住煮冬瓜湯。將浸雞料全部撈埋一起浸，然後落冬瓜件，慢火煲半個鐘，落少少鹽、蠔油及胡椒粉調味，或者再加芫荽碎。

4. 跟住準備自製辣醬。蒜頭、紅椒、芫荽頭放落石磨盅搗成蓉，之後加入1個青檸搾出嘅汁、1茶匙沙糖及適量熟油。如果冇石磨盅，就買現成醬汁代替啦。

小提示
如果想熟透，可以先浸20分鐘撈起隻雞，再將湯煮滾熄火，然後翻浸多20分鐘。要皮脆肉滑，就唔少得浸冰水呢個步驟，大約浸15分鐘可以撈起，食之前斬件上碟。