聞西──欺炸豬扒 粟粉溝麵粉做皮最理想

騙徒嘅手法真係層出不窮，近排我收到兩個來歷不明嘅電話，一個就話我個電話號碼涉及非法使用行為所以會被暫停，然後叫我按1字去查詢。另一個仲搞笑，話調查打咗針未，如果打咗就按1字確認，我作為一個精明嘅人，一聽就知係呃人嘅電話啦，梗係立即cut線。之後同朋友講起，好似有人試過跟騙徒指示按咗1字之後，發現網上銀行密碼就俾人偷咗，最後仲有金錢損失！

另外，上網又睇到呢段新聞：「網戀陷阱#欲收名貴禮物#32歲女投資經理遭假機師情人騙走300萬」。內容係女投資經理喺網上結識一個自稱「外籍機師」嘅人，好快就發展成為網上情侶，三個月後騙徒話要送名貴禮物畀佢喎，用唔同藉口叫佢畀清關、物流等嘅費用，就係咁，嗰個女經理冇咗300萬（點解會咁蠢㗎、點解咁有錢㗎）。所以呢大家真係要好小心，唔好諸事八卦，唔好咁易信陌生人，唔好貪心，保持頭腦清醒，做每樣嘢都要諗過先，記住畀人呃都係因為你主動畀機會啲騙徒咋！

畀人呃當然唔好受，不過都有例外嘅時候。例如咁：當你以為自己食緊豬扒，點知一咬落去先發現原來唔係豬扒嚟㗎，係豬肉薄片夾住又香又滑嘅流心芝士，外邊脆裡面軟，咁好食真係畀人呃都抵啦！嘻嘻…...呢個假豬扒其實係用打邊爐用嘅梅頭豬肉片層層疊疊咁做出嚟，中間可以放芝士或者其他材料。由於唔係真豬扒，個炸皮一定要hold得住啲材料先得，所以用嘅炸粉都有少少要求，我會用一半粟粉溝一半麵粉，個炸皮挺身得嚟又好鬆脆，如果想硬身啲就淨係用麵粉。不過，口感會有啲死實，但勝在夠安全冇咁容易散晒。

材料：
(三塊手掌大「豬扒」的份量）
火鍋用梅頭肉片9塊、片裝芝士6片、雞蛋2隻、日式麵包糠、粟粉、麵粉適量、日本椰菜半個、沙律汁適量

做法：
1. 椰菜慢慢切成幼絲做沙律（配任何沙律汁）。

2. 平放一張芝士片包裝膠紙，上面鋪上一片梅頭肉，然後落少少鹽調味（亦可以加入自己喜歡嘅口味，例如辣椒粉、五香准鹽等）。

3. 再鋪上芝士片（已切半），並重複以上步驟一次。想塊豬扒厚啲，可以做多一層（材料就要預多啲啦），喺最頂鋪一片肉，然後又放一張芝士片包裝膠紙，再用手壓實佢。

4. 中慢火燒熱油，準備三隻碟，一隻放炸粉、一隻放蛋漿、一隻放麵包糠，順次序將豬扒上粉、沾蛋漿，再撲上麵包糠，然後炸至金黃即可。

提提你：
呢個真係要趁熱食，否則芝士凍咗，就冇流心嘅效果喇。