聞西──熬吧！甜辣入味韓式魚板湯

大概因為餓旅行餓得太耐，大家都好努力咁喺日常生活中尋找旅行嘅感覺，例如拖喼去酒店staycation，享受一下執行李去酒店checkin嘅感覺，又或者去啲同旅行有關嘅主題餐廳。前排我就同朋友，幫襯咗一間喺尖沙咀嘅模仿韓國街頭路邊攤檔餐廳，佢哋用咗韓國藍色摺檯、紅色膠櫈、紫紅色橙光，加埋攤檔等裝飾，係有幾分置身韓國街頭食嘢嘅感覺，大家嘻嘻哈哈開心打卡又食得過癮。望真啲，其實啲裝修都幾低成本，呢啲咪叫食腦囉，開餐廳唔係一定要豪裝嘅。

難忘韓國街頭小食

至於食物質素就合格啦，畢竟韓國街頭小食都係以快靚正為主，我哋兩個大男人叫咗炸雞、韓式炒章魚、魚板湯，加埋杯柚子味馬格利酒，夠晒飽唔會做「餓爸」啦。話時話，真係好回味喺韓國街邊吹住西北風食魚板嘅溫暖感覺。魚板係韓國著名街頭小食，同我哋嘅魚蛋一樣都係用魚漿做，通常都會配個簡單味道嘅熱湯。最近發現一田超市都有急凍魚板賣，吓！原來好鬼平已經有一大包，咁不如自己煮啦，仲可以配韓式辣湯底，正過出街食啦！「」MA SHIDA（韓文：好好味）。

韓式湯底有兩種常用醬料，就係韓國大醬及韓國辣椒醬。大醬類同日式味噌，除咗湯底外亦可以用嚟醃肉、做沾醬，韓國辣椒醬因為加咗麥芽糖，所以係偏甜又唔會死辣。上面兩種醬亦都係拌飯醬主要材料，另外如果想湯底顏色靚啲，就要用韓國辣椒粉，因為韓國溫差大，所以辣椒會特別鮮紅，而且辣椒味好濃，但其實味道又唔係咁辣嘅。

材料：
魚板1包（12串）

鮮菇150g
旺菜150g
蜆半斤
蔥粒適量
水1公升
小魚乾50g

湯底調味：
韓國大醬及韓國辣椒醬各一大匙、韓國辣椒粉一湯匙或適量

做法：
1. 韓式銅鍋加水，落小魚乾慢火煮滾，留意不用冚蓋。

2. 湯水加入韓國大醬及韓國辣椒醬，鮮菇唔好用水洗，剪去根部用廚紙抹乾淨就得。旺菜切小件，待湯滾起就加入煮3分鐘。

3. 再落蜆煮至蜆殼剛開口，落韓國辣椒粉拌勻及試味，可再加大醬調味。

4. 再落魚板串煮5分鐘，留意要一直用慢火煮，最後落埋蔥花就可以。又或者，可以用打邊爐方式，逐一將魚板串煮熟。