味之生in芝士 黑松露拉絲火鍋

喜愛芝士應該無分國籍，去到邊度都好，芝士都係一種好治癒嘅食物，尤其係溶溶哋嘅芝士，拉絲嗰刻真係令人非常之興奮。冬天已經嚟到門口，有冇諗過喺屋企準備一個芝士火鍋嚟迎接佢呢？原來自己整都好容易，最重要係真材實料，好多餐廳所謂嘅芝士火鍋，裡面究竟有幾多芝士呢？打個杰撻撻嘅芡就算㗎喇，所以通常食落口感粉粉哋就係咁嚟。

一般芝士火鍋都會用兩種芝士以上調製，最正宗嘅會用瑞士格律耶爾Gruyères同埋愛蒙塔爾Emmental呢兩種，又或者Raclette加Emmental。不過，佢哋唔係所有喺超市都買到，今次我就好懶咁用咗兩款包裝碎芝士，包括Parmesan巴馬臣芝士及Cheddar車打芝士。巴馬臣芝士味濃厚，而車打就鹹香味好突出，橙橙哋色好靚，不過味道偏鹹。本人覺得今次嘅組合比較重口味，下次會trytry其他芝士配搭，另外芝士火鍋要加白酒煮溶啲芝士，記得要慢火煮一陣等啲酒精蒸發晒，如果一家大細食就可以用牛奶代替，記得牛奶係唔可以煲到滾起。至於包裝芝士，通常已加調味同埋鹽或者麵粉，所以今次我就唔會再好似其他芝士火鍋食譜咁打芡又加鹽喇，但係我加咗黑松露醬喎，感覺好似勁啲咁！hehe~

配料方面，我覺得冇乜所謂，唔一定要配麵包嘅，我就好鬼馬咁買咗寧記脆卜卜嘅即食油炸鬼，仲有西蘭花，好靚嘅三色小薯仔，包裝煙燻腸仔片，同埋超市現成嘅海鮮拼盤。喺屋企，食乜就由你話事啦，食芝士火鍋最基本都要有個爐及小鍋，如果你之前有外賣過某間公司嘅雪糕火鍋，嗰個煲仔就最啱使喇，又或者去淘番個平平哋嘅都得，再唔係用其他煲仔都可以，最緊要個爐火要好細，足夠令芝士keep住液態就得，太大火好容易會燶㗎。

材料：
芝士400g、白酒250ml、蒜頭2粒、黑松露醬2湯匙（其他配料就自己決定喇）

做法：
1. 由於芝士火鍋唔係用嚟畀你煮熟配料，基本上所有配料都要係熟嘅，例如西蘭花及薯仔就要預先灼熟。

2. 傳統用生蒜頭搽吓個煲，好似話可以避免燶底，仲添加啲蒜香味道。之後，倒入白酒，煮5分鐘至微滾等酒精蒸發。

3. 加入芝士慢慢拌勻至完全溶化，然後加入黑松露醬再拌勻。

4. 將配料擺得靚靚，咁就可以開動喇！