聞西──俄羅宋湯 冇蕃茄照樣返尋味

仲有一個星期左右就到聖誕，大家plan好晒節目未呢？其實，每年我都會去西貢大浪村住幾日，過一個綠色聖誕，同班老村民一齊煮下嘢食傾下偈，享受一下大自然。不過今年可能係我最後一次喺大浪村過聖誕節喇，因為自從8月有挖泥車涉嫌違法闖入西貢東郊野公園範圍，後來被傳媒揭發有人想重建西貢大浪村圖利。近排更有多間百年歷史嘅村屋俾人拆咗，宜家條村周圍頹垣敗瓦，實在令人痛心！

大浪村其實已經有超過250年歷史，可以話係香港歷史嘅一部份。而且條村位於鹹田考古遺址範圍，考古價值甚高，所以有任何現有建築物要更改、重建或者有新發展，都係需要經過城規會特別批准及諮詢古諮會，可惜破壞者根本當規定無到。有記者向規劃署查詢大浪村重建項目，只係得到回覆「無收過申請」，對件事好似「視若無睹」咁。村民仲話近日已經收到發展商嘅收屋通知，慨嘆條村已經冇得救喇！

雖然條村位於深山，不過仍然有小量村民居住，亦有人開田種菜，相信唔少行山人士都食過大浪村士多「阿嫂」炒嘅靚菜！或者係好山好水，農作物特別甜，我就用過阿嫂種嘅紅菜頭嚟煲俄羅斯羅宋湯，傳統嘅俄羅斯羅宋湯係唔會加蕃茄或者蕃茄膏，味道較接近雜菜湯，等煮好之後，就會落酸忌廉。湯頭微酸香滑，同我哋飲開又酸又辣嘅港版羅宋湯完全唔同㗎。聖誕party咁多嘢食，配個清清哋嘅湯就最啱喇！

材料：
紅菜頭、甘筍、洋葱各1個、薯仔2個、牛肉1斤約600g、椰菜半個、酸忌廉適量（或原味乳酪代替）、香草適量（裝飾用）、水1.5公升

做法：
1. 牛肉切粒煎香後加水煮滾。

2. 戴手套將紅菜頭及甘筍刨成絲，之後用白鑊炒至軟身後加入湯裡。

3. 薯仔切粒、洋蔥及椰菜切粗絲，全部加入湯裡。

4. 中慢火煲半個鐘就得，飲之前落1湯匙酸忌廉，最後用香草裝飾。

小貼士：
1. 唔想俾紅菜頭染到隻手紅色，就記得戴手套喇。

2. 素食可用合桃、栗子或豆類代替牛肉。

3. 紅菜頭、甘筍有炒過，會更加甜㗎。