聞西──鑊仔黃酒雞飯 拉丁靚樣沁臘鴨香

近排睇到一單令人好氣憤又心痛嘅新聞，就係香港保護兒童會發生虐兒事件。報道指該機構轄下位於旺角嘅0至3歲嬰幼兒院舍「童樂居」，有多個兒童被虐打。經翻查閉路電視紀錄，發現有職員對至少18名幼兒施襲，包括大力扯頭髮、大力拍頭、掌摑臉部及頭部，甚至將幼兒拋落地……

我細個嗰陣都係家暴嘅受害者，寄養父母經常對我作出暴力行為。掌摑已經係家常便飯，亦有全身藤條印、試過俾佢哋打腫面扑穿頭，四年級開始做童工。點解細路仔應該受到保護嘅時候，反而要承受呢啲痛苦，有冇諗過對佢哋嘅成長有幾大影響呢？所以除咗將呢啲衰人繩之於法，希望做緊相同行為嘅大人反省一下，及時改正自己嘅行為！

小朋友當然需要大人保護，至於大人就要好好照護自己。天氣凍最好食番啲保暖嘅嘢，我最鍾意就係黃酒雞，材料簡單又容易整，就算一個人都可以煮，有湯又有雞食。呢個餸，酒係主角，包括黃酒及糯米酒，兩者都可以喺街市雜貨鋪買到。不過，今次唔係教大家煮黃酒雞，而係將佢變成一個西班牙鑊仔飯嘅樣，飯裏面有酒香，為咗好味啲我仲加咗臘鴨髀，食落又好似煲仔飯。

記得飯同水份嘅比例係一比一，想酒味濃啲就減少水分比例再加黃酒，如果你冇西班牙鑊仔，咁用普通煲仔或者電飯煲都可以。

材料：
雞槌6隻或者用雞件代替都得、紅棗8粒、杞子大約2隻湯羹份量、薑6至8片、冬菇絲適量、臘鴨髀半隻、米2杯、水1杯、黃酒半杯、糯米酒半杯（1杯=100ml）、鹽適量

做法：
1. 雞槌洗乾淨落1茶匙鹽醃一醃、杞子及紅棗預先浸軟，紅棗3粒切半備用，其餘嘅切粒，另準備薑片。

2. 臘鴨髀出水備用，米洗乾淨之後放落鑊仔。

3. 另備小鍋先爆香薑片，然後落雞鎚略煎，並加入水及酒。跟住落杞子、冬菇絲及臘鴨髀，慢火煲滾煮5分鐘熄火。之後，試味唔夠鹹就落鹽調味。

4. 將雞鎚及其他材料整齊排在米上，然後將湯慢慢倒落去，再放餘下嘅紅棗裝飾。冚蓋用慢火煮至飯熟，熄火後焗多5分鐘，食之前可以落煲仔飯豉油及蔥粒。