聞西──雞茸粟米豆腐羹 成厚源自栗

當香港平安度過聖誕節，大家正準備過一個稍為正常嘅農曆新年，點知又被第五波疫情搞亂晒，就係咁，大家之前付出嘅抗疫努力仿如付諸流水。其實做任何事都係一念之間，如果嗰個空中服務員忍吓唔好出去行街食飯，乖乖完成隔離嘅結果或者會好唔一樣，如果達官貴人唔開生日派對......可惜現實世界係冇如果嘅。

食肆又要停晚市，真係「傷追人」！好多老闆朋友叫苦連天，農曆新年原本可以話係佢哋最後一個機會，以補返上年蝕咗嘅錢。為咗團年飯、春茗訂枱市道，佢哋已經入好晒食材，你話宜家點算好？一心諗住出街食團年飯嘅朋友仔，宜家要自己煮喇，唔好辛苦媽咪，主動幫手煮吓啦！團年飯又點少得湯羮呢，就煮呢個「快狠準」嘅雞茸栗子粟米豆腐羮。湯羮做法好似好簡單，其實有好多細節要注意。

由於湯羮煮嘅時間比較短，所以材料要切得比較細或薄，通常會切幼絲、幼粒或者攪成茸；肉類加蛋白醃有助鎖住水份，肉質就會滑滑嫩嫩喇。湯羮最重要就係打芡，我就會用粟粉加馬蹄粉，口感更加順滑又唔會水汪汪咁，而打芡時一定要用細火，邊落粉漿邊攪拌。另外，酒樓仲會有個包尾油步驟，就係湯羮煮好之後落少少油拌勻，湯羮會光滑啲賣相都吸引啲！

醃料 : 

鹽及胡椒粉各1/4茶匙、蛋白1隻

材料 : 

（4人份量）雞胸肉200g、忌廉粟米茸1盒、四方盒滑豆腐半件、栗子6粒、雞蛋2隻（其中一隻蛋白醃肉用）、櫻花蝦適量、粟粉2湯匙、馬蹄粉2湯匙、1公升水、植物油1湯匙

做法 :
1. 栗子用微波爐叮一分鐘，然後切粒。雞胸肉去筋才切件，並剁成茸落醃料醃一陣，豆腐則切幼粒備用。

2. 水煮滾先落栗子，然後加入粟米茸等候煲滾。

3. 粟粉及馬蹄粉，要加2湯匙水開成粉漿。將火調較到最細，邊落粉漿邊攪拌直至成糊狀。之後，落雞茸迅速攪拌，再落豆腐時就不可大力攪。

4. 落適量鹽及胡椒粉調味，就可以熄火。將蛋液逐少加入湯羮，慢慢攪拌成蛋絲。最後，落植物油拌勻，食之前撒上櫻花蝦及蔥粒作點綴。