聞西──香辣滷肉飯 大啖食為生活「加油」

人算不如天算，今個新年冇晚市團年飯、冇花市又唔使旨意拜年，咁仲話算唔算過年呢？唉……朋友住喺一街之隔嘅大廈，佢話其實冇咩好擔心，自己打齊三針就算中招應該都唔會變重症啩。佢最擔心反而係被隔離，甚至要去「糟糕灣」就大件事。佢同我講，喺屋企已準備好一個走難喼，裡面有齊晒隔離生活嘅必需品，事情真係發生嘅時候就無咁騰雞啦！

以前農曆新年，阿嫲都有所準備，就係買定幾棵天津大白菜、罐頭等做儲糧，因為舊時新年假期街市超市真係會休息㗎，你想買餸都幾難，取而代之嘅係滿街流動小販。當時，阿爺會帶我哋兄弟姊妹去掃街，即係食街邊小食呀，真係好有氣氛㗎，點似得宜家咁乾淨搵檔小販都難，商店餐廳年初一都照開門，呢個社會真係太過勤力喇！

宜家過年放假，真係唔怕冇嘢食，只係太懶唔想出街，而且又要專心煲劇，呢個時候最啱就係煮定一大鍋台式滷肉飯，拌飯或者拌麵食都得，我連續食幾餐都唔會厭㗎！

材料：
急凍切片五花腩肉一斤、乾冬菇200g、蒜頭10粒、乾蔥頭6個、乾紅椒5隻、八角3粒、剝殼熟雞蛋6隻

醃料：
粟粉2湯匙、糖2湯匙、五香粉2茶匙、生抽4湯匙、黑醬油2湯匙、冰糖1小塊

做法：
1. 首先將五花腩切幼條狀，加入醃料醃15分鐘，並準備蒜蓉及乾蔥蓉，乾紅椒切粒，冬菇浸軟後切粒。

2. 起鑊落油先煎香五花腩條，之後加入蒜蓉及乾蔥蓉炒香。

3. 加入冬菇粒、冰糖、八角及乾紅椒粒炒勻，然後加水，份量大約係材料嘅一倍。

4. 冚蓋滾起計慢火燜半個鐘，然後落雞蛋燜多半個鐘，最後以鹽調味，隔夜食仲好味啲。

小貼士：
1. 五花腩一定要夠肥，一層層嗰啲就最啱，今次用咗荷蘭急凍切片五花腩，已經切片方便處理

2. 由於呢個係一個有大量豬油嘅餸，所以加少少辣椒粒可以解油膩

3. 千祈唔好打芡，個汁水水質哋係最正宗又好送飯，而且翻熱都唔會咁容易燶底