聞西──青豆蝦仁 伴茄汁豆瓣醬變「典飯」

以前老人家話啲細路唔聽話，最鍾意講：等你撞過板先識學乖啲，我好認同㗎，人性就係咁，你越叫唔好做就偏偏要做。上星期全港瘋狂購物，大家都親歷奇景：超市大排長龍，食得嘅都俾人買晒，貨架全部清零。政府呼籲大家唔好咁喇，市民唔理咁多繼續狂買，幾日之後情況開始穩定，點解？買到成雪櫃都係菜，等到見到結果就係浪費，自然回歸理性。大家會唔會經一事長一智呢？

疫情嚴重，人心惶惶，各行各業開始頂唔順。好多食肆都捱唔住而無可奈何暫停營業，好多人都在家工作，宜家條街冷冷清清真係好得人驚。我好好彩繼續正常返工，上星期收工就買唔到餸，唔驚！屋企大把嘢食，不如打開雪櫃睇吓有咩材料，正所謂養兵千日用在一時嘛，買咗就要用㗎喇！我屋企雪櫃長期都有急凍蝦仁及青豆，因為我鍾意食。一個人碟頭飯最適合不過，滑蛋蝦仁飯食得多，今次加啲調味又有唔同嘅風味，點會悶㗎？睇下你肯唔肯花心思嘅啫。

醬料：
茄汁....................3湯匙
辣豆瓣醬.............1湯匙
薑蓉及蒜蓉.....各1茶匙

材料： (溫馨二人份量)
急凍蝦仁..................300g
青豆.........................100g
雞蛋..........................2隻
清雞湯或水............250ml

醃料：
胡椒粉......1/4茶匙
紹酒..............1茶匙
麻油..............1茶匙
粟粉..............1湯匙
蛋白.................半隻

調味料：
紹酒.......1茶匙
糖...........1茶匙
白醋.......1湯匙

做法：
1. 準備薑蓉及蒜蓉，將1隻蛋黃蛋白分開，半份蛋白留起醃蝦，其餘拌勻做蛋漿。醬料拌勻備用，青豆用水沖洗解凍。

2. 急凍蝦仁解凍，洗乾淨後用廚紙抹乾。落醃料中嘅胡椒粉、紹酒及半隻蛋白用手攪勻，然後再落粟粉及麻油拌勻醃一陣。

3. 起鑊落多少少油，將蝦仁煎至轉色立即盛起，之後落醬料炒香，加入蝦仁及青豆炒勻。

4. 落清雞湯、紹酒及糖，轉大火煮滾。用1湯匙粟粉開水打芡，然後加入蛋漿快速拌勻做成滑蛋，最後加埋白醋拌勻就搞掂。

小貼士：

1. 手溫令醃蝦蛋白更易攪散。
2. 醬料要炒過先會香㗎。
3. 清水代清雞湯，要落鹽調味。
4. 改用其他肉，就唔需要落蛋白去醃。