聞西──泰式白酒煮青口 一齊食鮮係重點

疫情漸趨緩和，期待可以再次去旅行嘅希望又重現喇！事實上回港隔離減至七日嘅規定生效之後，身邊好多朋友都蠢蠢欲動打算重新「出發」。餓咗咁耐冇去旅行，梗係好多地方想去，近來大家傾偈嘅話題，都離唔開「如果」可以再去旅行你會去邊度呢？「如果」呢兩隻字真係令人有幾分唏噓！

同朋友去旅行最好就係住民宿，因為有個廚房可以俾你發揮一下，有時去到當地嘅街市超市，見到啲好新鮮又平過香港好多嘅食材，真係突然會想露兩手。記得某年去西班牙巴塞隆拿，行過超市見到啲青口又平又新鮮，加上當地嘅白酒仲平過礦泉水，於是一心整個白酒煮青口啦，不過勢估唔到洋蔥同香草反而貴過青口，諗番起都覺得好笑。

新鮮同急凍青口價錢同味道都差好遠，整白酒煮青口千祈唔好用急凍貨色，因為已經喺加工嘅時候煮熟咗，海水味基本上已經清零。我就會買真空包裝嘅入口青口，因為裡面有海水養住，保證新鮮之餘亦提供鮮味及鹽份。朋友問青口有執毛好難搣走佢，其實嗰啲係青口嘅腳（足絲），用嚟抓住石頭唔好俾海水沖走。如果喺屋企食，我就會直接煮，食嘅時候先搣走佢，慳返好多力水及功夫，其實煮之前洗乾淨個外殼就得。今次用咗我至愛嘅泰式煮法，個汁真係超正，梗係用嚟配蒜蓉包啦！

材料：
新鮮青口.......800g
洋蔥................1個
蒜頭................6粒
白酒................300ml
牛油....................25g
冬蔭公香料包.....1個
泰式辣醬..........3湯匙
蕃茄仔...............10粒
法包及蒜蓉醬......適量

做法：
1. 青口洗乾淨、冬蔭公香料包處理好（如圖）、洋蔥切絲、蕃茄仔切半。

2. 法包切厚片，搽上適量蒜蓉醬後，放入焗爐焗至金黃。

3. 高身煲落牛油及橄欖油，落洋蔥炒至軟身。然後加冬蔭公香料及蒜蓉炒香，再落泰式辣醬及青口炒勻。

4. 加入白酒轉大火煮1分鐘等酒蒸發，然後冚蓋煮3至5分鐘直至青口全開。最後，落埋蕃茄仔及青檸汁就食得。