聞西──豬肉湯配拌飯 韓式食法不怕胖

睇得韓劇多大概都知道韓國嘅飲食習慣，例如《來自星星的你》嘅韓式炸雞、《太陽的後裔》嘅韓式冷麵、《繼承者們》嘅韓式炸醬麵，仲有喺無數韓劇出現過嘅辣炒年糕、人蔘雞湯、石頭鍋飯等……。

唔好以為韓國菜都係紅卜卜好辣咁，其實韓國飲食相當注重醫食同源、陰陽五行同埋營養均衡，仲會配合埋二十四節氣同當造食材。

例如石頭鍋飯裏頭就有甘筍、青瓜、芽菜、蛋絲、木耳等五種顏色食物配搭，又例如韓式燒烤，食肉之餘會配合大量新鮮蔬菜包肉一齊食，加埋啲泡菜、醃蘿蔔又可以幫助消化同去油膩，好似時刻都幫緊你養身咁，唔怪之得啲韓星個個都咁靚仔靚女啦！

韓餐葷素兼備非一味靠辣

想當年第一次去韓國就買咗個石頭鍋飯嘅石鍋返屋企，仲要係handcarry，重到呢！之後每年冬天我都會自己整石頭鍋飯，材料雖然未必有齊五隻顏色，不過一定要有韓式拌飯醬同埋醬油，再加埋麻油做成卜卜脆嘅飯焦。

同樣嘅材料到咗夏天就會用嚟做伴飯，如果整切片五花腩肉只要加個洋蔥，再落香菇、芹菜就係一個好好味嘅例湯，放心啦！買個十幾蚊嘅刨就可以輕鬆將甘筍同青瓜刨絲，整整齊齊咁排喺碗，心情都會好啲！

材料：
白飯.............2碗
溫室青瓜......1條
甘筍.............1條
本菇...............150g
去皮五花腩....309g
洋蔥................1個

新鮮香菇、芹菜、紫菜、韓式拌飯醬、醬油適量

做法：
1. 準備洋蔥豬肉湯，五花腩出水沖洗乾淨，洋蔥去皮原個鎅花方便出味，但唔好切到底，1.5公升水煲滾，放入五花腩及洋蔥，慢火煮半個鐘。

2. 之後落新鮮香菇及芹菜滾多5分鐘，最後落鹽及胡椒粉調味。

3. 本菇炒至軟身，落少少醬油調味然後攤凍，甘筍、溫室青瓜用刨絲，青瓜絲用手略略揸亁水份，甘筍絲用白鑊炒半分鐘至軟身。

4. 五花腩夾起攤凍切片。

5. 白飯裝落大碗，放適量五花腩、甘筍絲、青瓜絲、本菇、紫菜，然後落韓式拌飯醬及醬油，拌勻就食得。