聞西──小炒王配明太子 點止十個脆

以前家住堅尼地城，每個禮拜總有一晚去「權X小廚」食晚飯，宜家仲喺唔喺度就唔知，不過舊時佢哋好好生意勁排長龍，所以屋企人都會「使」當時仲係初中生嘅我去等位，好多次我攞咗枱，但係等咗好耐都未見人，等位啲人見我一個細路霸住張枱眼望望，伙記又不時過嚟「關心」吓我，場面真係超尷尬，我諗宜家啲父母一定唔會捨得咁做啦！

點解提起「權X」，因為佢哋最出名小炒夠鑊氣囉，有時你會聽到廚房「逢逢」聲，就係嗰啲火力勁猛嘅高壓爐炒緊嘢，小菜有鑊氣係零舍唔同，所以每次去必定會叫「小炒皇」呢個餸，因為佢最能夠體現鑊氣。

今次同大家神還原呢個餸，唔止呀，我仲會加一樣好特別嘅材料，佢就係明太子，大家都應該食過明太子，其實佢係加咗辣椒粉等調味料醃漬過嘅魚卵，用嚟撈飯或者煮意粉都唔錯，咁點解諗到用嚟做小炒皇呢，因為之前食過一味川菜「魚春乾鍋」，啲魚春炸過之後非常香口。如果用高溫快炒明太子，整碟餸就會更加香口，大家試過就知㗎喇！留意明太子外邊有層薄膜，必須先用刀𠝹開，然後再刮出明太子粒粒。

如果想好食，蝦乾同魚仔就一定要走油，一來香口啲，二來減少炒嘅時間就唔會過火啦！另外唔好怕嘥油，炸過蝦乾嘅油會有陣香噴噴嘅蝦油味，用嚟炒餸無得頂！魚仔身形細小所以炸一陣就會脆身，大家一定會喜歡脆卜卜嘅口感。

材料：
韮菜花.........1扎
大蝦乾.......10隻
銀魚仔........半両
大紅椒.........1隻
乾蔥頭、蒜頭........各3粒
明太子..................2-3條
已浸軟雲耳..............適量

調味料：
魚露.........1湯匙
紹酒.........1湯匙
糖.............1茶匙
麻油............適量

做法：
1. 大蝦乾浸軟開邊，清理蝦腸（如有），用廚紙印乾，燒熱一小鍋油，落蝦乾炸至金黃，撈起再炸銀魚仔。

2. 韮菜花切段，大紅椒切絲，雲耳浸軟，準備乾蔥蓉及蒜蓉備用。

3. 用刀𠝹開明太子外邊嘅薄膜，然後再刮出明太子粒粒。

4. 燒熱隻鑊落油，先爆香乾蔥蓉及蒜蓉，然後落韮菜花同雲耳炒勻。

5. 再落明太子粒粒，炒到聞到咸香味就可以落埋紅椒絲、炸過嘅蝦乾同銀魚仔炒勻，落魚露、鑊邊落紹酒，之後再炒勻，最後鑊邊落麻油炒勻上碟，炒嘅過程應該4-5分鐘之內完成。