聞西──金沙雙蔬 唔止惹火仲要惹味

上星期新界西大停電成為一時熱話，今時今日有幾多人會為停電作準備呢？見到網上勁多人投訴，明白大熱天無風扇無冷氣大家都好火好燥，但係面對呢啲情況最重要係冷靜同埋小心火種，老土啲講句意外嘅嘢大家都唔想嘅。

記憶所及香港真係好耐冇試過大停電，住大西北嘅我梗係有份啦，好在我早有準備，立即點起蠟燭，屋企都唔會「黑蚊蚊」，幸運地兩個鐘之後就有番電了。以前住公屋經常都會停電，屋企特定位置放咗蠟燭、電筒，遇到停電阿嫲會淡淡定咁應對。

其實停電最多都係捱熱，我最擔心嘅反而係雪櫃裡面啲嘢，仲啱啱先入完貨呢！其實食物安全中心都有啲建議俾大家，就係盡量唔好打開個雪櫃門，有助延長裡面嘅低溫。

別開雪櫃門 可保存低溫

原來雪櫃喺停電之後仍然有2至4小時嘅冷凍效能，全滿冰格嘅食物更可保存48小時，而半滿嘅都有24小時，好似今次停咗大半日，按道理冰格啲食物應該都可倖存嘅，但如果超過24小時，冷藏格嘅食物就冇得救㗎喇，事關細菌會喺攝氏4度至60度非冷藏環境下迅速生長，食咗肚仔痛仲大件事。

正所謂以毒供毒，今次一於火上加油，做個上火菜式：金沙酥脆雙蔬，好邪惡但好好味，鹹蛋黃鹹香惹味，加埋脆卜卜嘅茄子同椰菜花，非常惹火又滋味，自己整我會亳不手軟勁多「金沙」，因為我好鍾意食鹹蛋黃囉，就偶然一次食個夠吧！

材料：
椰菜花...........半個（250g）
茄子...............半條（150g）
金不換.....1扎（可以唔要）
無鹽牛油........................40g
鹹蛋黃...........................6粒

脆漿材料：
炸粉100g、冰凍啤酒120ml、糖及鹽1/2茶匙、胡椒粉、五香粉及辣椒粉各1/4茶匙。

做法：
1. 鹹蛋黃隔水蒸10分鐘再壓碎備用。椰菜花及茄子切件後用鹽水浸幾分鐘，然後用廚紙抹乾。金不換去筐留葉。

2. 準備脆漿，全部材料攪勻即可（記住一定要用冰凍嘅水或者啤酒做出嚟嘅炸皮先會酥脆）。將椰菜花及茄子加入脆漿拌勻。

3. 如果想更香脆可以再上一層幼身蕃薯粉，或者上完脆漿直接去炸都得。留意炸蔬菜油溫唔可以太低，要用短時間將材料炸熟先唔會肥淋淋同埋乾身。另外炸金不換時會勁彈油，如果怕就唔好試喇。

4. 最後步驟整金沙，細火炒溶牛油，然後落鹹蛋黃碎不斷炒至起泡泡，就可以落炸好嘅椰菜花同埋茄子快速炒勻熄火。最後加埋炸咗嘅金不換葉及紅椒片（裝飾用）就完成喇，記得趁熱食喎！