聞西──大盤啤酒雞 唔止要辣仲要夠滑

究竟個太陽伯伯係唔係病咗呢？已經連續好多日三十五度以上，好在我係早出晚歸人士，日頭又吹住冷氣做嘢，但「戥」戶外工作嘅朋友仔辛苦。不過講熱香港點都唔夠歐洲咁熱，新聞話英國氣溫高達四十度以上，而且歐洲大多數人嘅屋企都冇裝冷氣，面對高溫的確比我哋嘆慣冷氣嘅辛苦好多！

最近網上討論點解歐洲多數地方冇冷氣，其實同地理位置有關，歐洲大部份國家都係位處地球緯度40度以上，即係祖國東北三省位置，所以暖氣比冷氣重要得多。除此之外，原來瑞士有明文規定禁止裝冷氣機，佢哋政府雖然大把錢，但更注重環保同健康，講到尾大家都係住喺地球村，你衰我都唔會好，點解唔一齊去愛護同珍惜佢呢？

寬麵索晒汁夠惹味

天氣越熱我就越想食辣，除咗因為冇乜胃口之外，食完辣嘢出一身汗個人反而會舒服咗。如果你都係嗜辣之徒，呢個大盤啤酒雞食譜就啱晒你喇！大盤雞來自新疆，主要材料有雞同薯仔，亦用上好多香料例如：花椒、香葉、辣椒乾、桂皮、八角等，其實都有啲似川菜。我記得第一次食呢個餸係喺西藏一家清真麵店，佢哋會配一種寬條麵索晒啲汁，又香又麻真係好好食。花椒嘅麻辣絕對係呢個餸嘅靈魂，不過自製花椒油都需要啲技巧，唔識就用現成嘅都得，另外啤酒可以令到雞肉更加嫩滑㗎！

乾香料：
月桂葉幾片
八角2粒
桂皮1塊
乾辣椒適量

醃料：
米酒2湯匙
生抽1湯匙
老抽1湯匙
胡椒粉少少

調味料：
豆瓣醬2湯匙
蠔油1湯匙

材料：
雞半隻
薯仔1個
番茄1個
黃椒半個
洋蔥半個
蒜蓉2湯匙
鮮菇適量
花椒油2湯匙
啤酒1罐

做法：
1. 雞件洗乾淨加醃料醃半個鐘，薯仔切半再切厚片，洋蔥、黃椒切塊、番茄去籽同樣切塊，乾香料要洗乾淨。

2. 冷鑊落油及花椒油，慢火加熱，落雞件後轉中火煎香兩邊，之後落洋蔥及調味料炒香。

3. 再落薯仔、鮮菇、乾香料炒香，然後加入啤酒，冚蓋煮至滾起就轉慢火炆十分鐘，另外煲水煮熟刀削麵，加少少麻油撈勻放喺大盤中。

4. 大盤雞落鹽調味，跟住打個薄芡，最後淋上麵條上面就得，又或者可以將麵條直接加落大盤雞煮一陣再上碟。