聞西──山藥襯底有秘訣 配埋肉餅好Match

早前政府宣布放寬自海外及台灣抵港入境檢疫措施，海外入境檢疫由酒店7日檢疫改為3+4，即3晚酒店隔離加4晚居家醫學監察，我身邊好多朋友大喜，又話準備買機票訂酒店去旅行，唔講仲以為係完全取消晒啲防疫政策𠻹！

之前有朋友試過，去完旅行返嚟香港之前班機突然取消咗，又趕唔切改隔離酒店，之後仲喺外地中埋招，最後要大半個月後先返到香港，所以都係睇定啲好喎！繼續冇得去旅行，惟有化悲憤為食量，近排成日去食Omakase、日本烤肉，就知我幾咁掛住日本啦。講開日本有兩樣食物我仲未接受到：第一樣就係納豆，聞起嚟臭臭味又滑潺潺；第二樣就係山藥泥，第一次見到我幾乎暈低，夾起真係好似鼻涕或者「放飛劍」嗰啲，講起都有啲反胃。

低熱量兼飽肚 減肥聖物

不過近排我第N次減肥，留意到山藥原來係減肥聖物，不但低熱量，而且有豐富水溶性膳食纖維，有助減慢腸道吸收，同埋增加飽肚感，咁就畀多次機會佢啦。

將山藥磨成蓉之後加入雞蛋，口感滑滑哋有啲似白汁，原本諗住將山藥泥放喺肉餅上面再蒸熟，不過為咗效果靚啲，我將肉餅煎香之後放喺山藥泥上面再焗。山藥泥可以配明太子或者雜錦海鮮，就會變成一個冇牛油嘅健康白汁喇。如果將肉餅改做飯底就會變成美味碟頭飯，記得趁熱食呀！

材料：
免治豬肉300g、
山藥泥300g、
大蔥25g、明太子1條、
芝士碎50g、雞蛋1隻、
沙律醬2湯匙、鹽1/4茶匙

醃料：
鹽............1/4茶匙
胡椒粉....1/2茶匙
生抽...........1茶匙
油...............1茶匙
粟粉...........1湯匙

做法：
1. 免治豬肉落醃料拌勻，再將大蔥切碎加入免治豬肉拌勻醃15分鐘。

2. 將山藥去皮，然後用刨磨成山藥泥，明太子除去外層薄衣刮出粒粒。

3. 蛋漿、明太子、芝士碎、沙律醬及鹽逐一加入山藥泥攪勻，置於焗盤中。

4. 平底鑊加熱落油，將免治豬肉壓成肉餅型，然後煎香兩面，鏟起放喺山藥泥上面，放入焗爐以200度焗大約10分鐘就得。

小貼士：
處理山藥最好戴返手套，避免皮膚痕癢！