聞西─話梅可樂南瓜雞翼 酸甜可口到飛起

英女皇逝世勾起好多老一輩人對舊事嘅懷緬，唔理世事變改，日子確實是有發生過的。過往四圍都會見到佢個頭像，硬幣又見到佢、郵票又見到佢，好多地方例如醫院、馬路都會以佢個名命名，以前香港人幫佢起咗個好貼地嘅名，叫佢「事頭婆」。對於生在那個年代嘅人，佢就好似陪伴住我哋一齊長大嘅一個大人物，除此之外大家都好關心佢嘅家事呢，哈哈！

上世紀嘅事大概已經淹沒在時代裏，就好似以前嘅零食，大家都會稱之為「鹹濕嘢」又或者「口立濕」，斯文啲嘅叫法係「涼果」。仲記唔記得戲院門口架零食車？話梅、陳皮、冬薑、山楂片、清心果、八仙果等等，款式多到數唔晒。時移世易，賣鹹濕嘢嘅地方真係買少見少，過往一個幾毫嘅話梅嚟到依家絶不便宜，好嘅貨式最貴可以索價過百蚊一両甚至更貴都有。

有關涼果嘅餸當然唔少，講到最出名嘅梗係話梅可樂雞翼。真係唔知邊個咁叻將佢哋拉埋一齊，做出酸酸甜甜嘅味道，亦令人嚐到陣陣話梅獨有嘅香味。至於用邊種話梅先最適合呢？最好用九製話梅或者表面有白色粉末嗰種甜話梅，仲要係喺有信譽嘅涼果店買，千祈唔好貪平求其買街邊嗰啲平話梅，因為煮出嚟嘅味道可以差天共地！最好自己嗒一粒試吓先，太甜嘅就落少啲，煮多幾次就可調教到最啱嘅味道㗎喇。煮呢個餸我鍾意加白苦瓜，索晒啲汁好好味，今次買唔到就用南瓜代替，啱晒鍾意甜甜味道嘅朋友仔！

材料：
雞翼..............................半斤
日本南瓜仔.......1個約300g
可樂....................1罐330ml
洋蔥..............................半個
話梅...............................5粒
蒜頭...............................3粒
薑..................................幾片

醃料：
生抽........................1湯匙
紹酒........................1湯匙
黑醬油或老抽..........1湯匙
胡椒粉....................少量

做法：
1. 雞翼落醃料及蒜蓉醃一個鐘，南瓜及洋蔥切件備用。留意南瓜件要切大件啲，咁就冇咁容易煮到散晒。

2. 煎鑊落油落薑片起鑊，再落雞翼煎香兩邊，同時可以落洋蔥炒香。

3. 加入南瓜件，然後倒入可樂。

4. 落話梅後冚蓋，待滾起計轉慢火煮20分鐘，直至收汁就得。最後落少少鹽調味，如果怕太甜，可以加一至兩湯匙香醋中和味道。