聞西──梅菜蓮藕煎肉餅 脆香濃搶過「土匪」

「誰會珍惜當你還擁有，將要逝去總想挽留……」上個世紀睇過日劇《阿信的故事》嘅你，一定識唱呢首主題曲，最近九龍城有48年歷史嘅老字號豪華餅店一度宣布結業，嗰幾日例牌突然好生意呀！排晒長龍乜都買光光，記者訪問排隊嘅人個個都話好可惜，又話老店買少見少，講到好唔捨得咁，點知來個反高潮，訪問老店員時佢口直心快話大家唔識珍惜，平時又唔見有人排隊，執笠先嚟排……其實佢咁講又真係冇錯喎。

貪新都唔一定要忘舊嘅，二者點解唔可以共存呢？好似傳統菜式都可以加啲新點子，保持新鮮感又唔會過時。我家屏山附近有間煎肉餅專門店，獨沽一味賣煎肉餅飯，不過佢哋經常會推出唔同嘅口味，例如榴槤、芝士、口水雞等等，我最鍾意係梅菜煎肉餅同埋土匪雞翼口味煎肉餅，今次就將佢哋放埋一齊變成我嘅土匪梅菜蓮藕煎肉餅。

整煎肉餅一向屬於低難度，買件梅頭肉自己剁當然最好，為免隔籬鄰舍投訴，用免治豬肉都冇問題啦，但最好係三分肥七分瘦，煎出嚟嘅肉餅先會香脆多汁。今次用咗台灣嘅梅乾菜，味道比較清淡而且冇咁鹹，而土匪調味料就有孜然粉同埋麻辣粉。至於蓮藕，就可以切片再釀豬肉，又或者切粒混入肉中都得。

材料：

蓮藕片................10片
免治豬肉.............250g
梅菜乾...................10g
雞蛋.....................1隻
青花椒油...........1湯匙

醃料：

鹽1/2茶
孜然粉1/2茶
麻辣粉（辣椒粉）1/2茶
粟粉1/2茶
糖1/2茶

做法：

1. 梅菜乾浸軟洗乾淨、揸乾水切粒，蓮藕去皮洗乾淨切片。

2. 免治豬肉先落醃料及蛋漿拌勻，隨後加入梅菜乾及青花椒油，大力攪動至起膠。

3 .蓮藕片撲上粟粉，釀入適量肉餡，並用湯匙輕輕壓扁。

4. 燒熱煎鑊落油，將有肉餡一面先放入鑊，用慢火將兩面煎到金黃色及全熟就得。