回復疫情前嘅生活,相信係好多人過去兩年嘅聖誕願望,今個聖誕終於有啲願望成真嘅感覺喇,包括我自己在內都已經出發去咗旅行。放假旅行呢啲先至係香港人嘅基因嘛,不過身邊仲有啲朋友因為其他原因未有出外,咁喺呢個普天同慶嘅日子又有冇打算約埋成班朋友仔開party呢?
而家嘅聖誕party大家都會貪方便叫外賣食物,例如薄餅、壽司或到會,就係乾手淨腳唔使煩,不過少咗啲人情味囉。記得以前學校聖誕party,同學都會分工合作預備小食,例如鹵水雞翼、經典菠蘿腸仔、三文治、咖哩魚蛋等等,同時都係大家一展廚藝嘅大好機會!
今次分享一個暖笠笠嘅聖誕麵包布甸食譜,好適合作為聖誕party嘅壓軸甜品,有人會話呢個甜品冇乜特別,希望我呢個版本可以令你改觀啦!麵包布甸主角當然係麵包,一般食譜都會用白麵包,但我唔鍾意佢太腍嘅口感,所以用咗外皮酥脆內裡柔軟嘅丹麥包代替,其次每塊面飽都要搽牛油、搽橙味果醬,然後再撒上大量玉桂粉,呢個步驟可以令到味道更加豐富同平均啲。另外,今次我改用紅莓乾代替提子乾,味道無提子乾咁搶,記得同樣要預先用Rum酒浸一晚等佢入味同軟身,食嘅時候仲可以配雪糕。如果用嚟浸麵包嘅吉士液有剩,可以煮熱淋上布甸,熱辣辣嘅玉桂味真係好有聖誕氣氛!
祝大家聖誕快樂、新年快樂。
材料:
丹麥包6片(薄片)、室溫牛油適量、橙味果醬適量、肉桂粉適量、幼沙糖60g、紅莓乾40g、雲呢拿香油1茶匙、牛奶200ml、鮮忌廉200ml、雞蛋5隻、Rum酒適量、橙1個及適量糖霜(裝飾用)
做法:
1. 先準備吉士液,雞蛋打勻後加入牛奶、鮮忌廉、幼沙糖及雲呢拿香油,攪拌至幼沙糖完全溶化及順滑。紅莓乾用Rum酒浸隔夜、橙切牛再切片。
2. 如果你買嘅丹麥包係厚切嘅話,咐就要將佢橫切一開二,然後逐片依次序搽上室溫牛油、橙味果醬,再按自己喜好撒上適量肉桂粉。
3. 焗盤搽上室溫牛油,將「做法2」已調味嘅丹麥麵包切成小三角形,然後不則的脣脣量量鋪滿焗盤。之後,放橙片及紅莓乾,如果喜歡酒味重啲,可以淋啲浸過紅莓乾嘅Rum酒。
4. 慢慢倒入「做法1」嘅吉士液,待15至20分鑸確保麵包吸滿吉士液。期間,預熱焗爐170度,將布甸放在焗爐盤上,入爐之後喺焗爐盤注入適量水份,大約焗30至40分鐘至凝固及表面金黃色。出爐後撒少少糖霜做裝飾,就大功告成。
型色‧煮意
生活
學習