聞西──日式蛋包飯 自溝醬汁同樣Ichiban

近排大量港人遊日（包括小弟在內），據日本旅遊局最新統計，2022年10月至11月期間，入境當地嘅香港旅客有11.9萬，按年增幅排第一，按人數則排名第四，你都咪話唔犀利。又係嘅，餓咗咁耐都好正常，而家抱嘅心態梗係有得飛就飛咗先啦，今日唔知聽日事，各地嘅防疫政策仲不時更改，好似啱啱過咗嘅聖誕節，我去咗日本九州福岡，旅程中途收到訊息話日本政府對香港航班實施限制，迫於無奈之下立即要安排由大阪返香港，好彩最後又可以按原定行程由福岡返香港。

旅行就係咁樣有好多嘢不似預期，咁不如隨遇而安啦，就好似食嘢，除咗必須要訂位嗰啲之外，我都係鍾意行到邊食到邊。喺日本，我最鍾意星乃咖啡店，雖然係連鎖式經營，不過出品絕對高質，加埋啲復古裝修真係物超所值，去到一定要試佢哋個蛋包飯：首先用鐵板上已經好有誠意，凍冰冰保溫好重要，再者個牛肉汁非常濃厚，蛋皮又薄又幼滑，裡面嘅茄汁炒飯雖然冇料，不過粒粒分明又唔會過濕，成個味道配搭真係好掂，下次一定要再食！

未到下次之前唯有靠自己，做蛋包飯可以分三個步驟，首先係茄汁炒飯，唔可以淨係用茄汁，要加埋茄膏先會夠色水，有啲食譜會落洋蔥、雞肉粒，不過我怕個飯太濕所以改咗用腸仔切粒粒。第二就係個蛋皮，煎蛋皮用嘅平底煎pan要用慢火，慢慢煎到個蛋皮有六七成熟先會滑㗎。第三就係個深啡色醬汁，其實佢係法式料理demi-glace sauce醬汁，融合咗蔬菜嘅甘甜同紅酒及牛肉嘅美味。喺屋企煮唔想咁複雜，我有個簡單嘅版本，就係用日本醬油、日式豬排醬或大阪燒醬、喼汁同埋茄汁，再加牛肉汁，就可以做到一個似模似樣嘅醬汁，再懶啲就咁用番茄醬都得嘅。

材料：

白飯............1碗

雞蛋............3隻

牛柳粒.......120g

腸仔............1條

洋蔥.........1/4個

醬汁材料：

大阪燒醬...........80ml

茄汁..................40ml

糖....................1湯匙

醬油................1茶匙

喼汁.............1/2茶匙

牛肉汁...............80ml

炒飯汁：

茄汁.........2湯匙

茄膏.........2湯匙

做法：

1. 先預備炒飯。冷飯放入微波爐叮熱，腸仔及洋蔥切細粒，茄汁與茄膏拌勻，燒熱鑊落油炒香腸仔及洋蔥粒。然後，轉大火倒入冷飯及炒飯汁，快速翻炒至均勻備用。

2. 牛柳粒用少少牛油煎香，在鍋內加80ml熱水煮一分鐘，撈起牛柳粒，餘下嘅肉汁留起煮汁用。

3. 開始煮醬汁，將醬汁材料撈勻後倒入小鍋，用慢火邊煮邊攪拌，直至適合嘅濃稠度，然後加入牛肉粒熄火。

4. 整蛋皮，將雞蛋打散，如果有牛奶可以落1大湯匙再拌勻。平底易潔煎pan以細火慢慢加熱，落少少牛油後倒入蛋醬，以筷子快速攪拌至蛋液平均分佈喺煎pan及開始凝固，等蛋皮約七成熟，就可以離火。然後將炒飯倒入蛋皮中間，慢慢傾斜煎pan後，用鑊鏟將蛋皮反到炒飯方向，再倒扣落碟，並用保鮮紙整理蛋皮成橄欖型。最後，淋上適量醬汁及牛肉粒就搞掂。