聞西─荷包滿滿荷葉飯 足料剪開新一

踏入兔年首先祝大家新年快樂、身體健康、事事順心、工作順利！中國人慶祝農曆新年係自然不過嘅事，但原來有啲國家同樣有慶祝農曆新年嘅習慣，例如韓國、印尼、越南等，今日就想同大家分享一啲越南過年嘅有趣資料。

大家都知今年係兔年，不過喺越南今年竟然係貓年！乜十二生肖有貓嘅咩？隻兔仔又去咗邊樹呢？原來越南習慣用地支嚟代替生肖名稱，例如鼠年就叫子年、牛年就叫丑年，相傳到卯年即係兔年，因為「卯」喺越南話讀音好似個「貓」字，經年累月之後就變咗而家嘅「貓年」喇，所以今個農曆新年街上嘅裝飾都會以貓嘅造型為主。如果你係貓奴，不妨去越南感受一下貓年嘅氣氛！

越南家庭過年，同樣會準備一啲好有意頭嘅菜式。喺越南中南部，當地人習慣過年煮苦瓜豬肉湯，因為喺越南話苦瓜個讀音，同「苦過」嘅讀音好似，當中寓意吃完苦之後，新嘅一年將會十分順利平安，就會苦盡甘來。苦我就唔想再吃喇，不如試試今次介紹嘅荷包滿滿荷葉飯啦，見到佢脹卜卜，真係好似一個放滿錢錢嘅荷包一樣。荷葉飯裡面有冬菇、大蝦乾、瑤柱、芋頭、芹菜等材料，加埋荷葉嘅香味真係令人難以抗拒。記住芋頭切粒後，要用油半煎炸到外表金黃，煮完之後會無咁易散開，無鵝肝腸用臘腸代替都可以。呢個餸睇落簡單，不過好多材料都要切粒粒，相信屋企人都會感受到你嘅耐心同誠意，我就最期待剪開荷葉嗰一刻喇！

材料：

冷飯............500g

乾冬菇..........適量

大蝦乾..........6隻

瑤柱......3至4粒

芋頭............200g

薑.................3片

芹菜.............1棵

乾荷葉..........1塊

鵝肝腸..........2條

調味：

生抽.......3湯匙

五香粉....1茶匙

胡椒粉.......少許

做法：

1. 乾冬菇、大蝦乾及瑤柱，需要預先浸軟（大家應按材料大小再自行調節數量），冬菇和蝦乾切粒，瑤柱用手摔碎，鵝肝腸切粒。

2. 芋頭去皮切片再切成細粒，用多少少油半煎炒至金黃色盛起。荷葉用熱水浸軟洗乾淨備用，芹菜切粒，薑片切成幼粒。

3. 準備好所有材料就可以炒飯，易潔鑊燒熱落多少少油，先爆香冬菇、蝦乾、瑤柱、鵝肝腸粒及薑粒，再加入冷飯炒勻。

4. 當感受到飯粒夠熱之後，即落調味料炒勻，然後加入芹菜及芋頭粒炒勻就可熄火。將荷葉放於大碗中，倒入炒飯並封口，上面放一隻細碟壓住，隔水中慢火蒸半個鐘，最後倒扣喺碟上面，食之前煎開荷葉就得。