聞西──砵仔素禾蟲 當焗者迷旁觀者清

最近有網民Facebook post同事喺某大快餐店外賣煲仔飯，仲有個紙盒裝住個煲仔，點知返屋企途中，行行吓個盒忽然著咗火，睇相見到個紙盒已經燒咗一半，一地都係灰，名正言順明火煲仔飯！幸好最後喺途人協助之下，撲熄咗個火兼無人受傷，事後快餐店好快聯絡到事主道歉及賠償，不過反而瞞著萬千網民，原來佢哋提出賠償$500蚊餐飲券，而且限事主兩個月內要用咗佢，可以算係一場關公災難。

講開外賣，舊時有啲餐廳會用砵仔做外賣餸，例如芋頭炆鴨或者梅菜扣肉，我都曾經幫襯過，個砵仔仲保存得好好添。砵仔同瓦煲一樣可以保持食物嘅溫度，有啲菜式都會用到砵仔，例如好恐怖但好好食嘅焗禾蟲，禾蟲我就唔夠膽煮喇，之不過今次分享嘅「砵仔焗素禾蟲」，大家不妨可以試吓。參考咗做素黃鱔嘅方法，將冬菇沿住邊剪成幼條再切段扮蟲蟲，再加上類似蟲蟲嘅蟲草花及金菇，望落真係有幾分似焗禾蟲，驚驚！

白胡椒粉絕對係呢個餸嘅靈魂，其實材料都好有彈性，有時打邊爐剩番少少嘢，例如啲菇呀又或者雪櫃𥚃面嘅「廚餘」，都可以用嚟做焗蛋嘅材料㗎。如果屋企無砵仔，可以用鋪咗烘焙紙嘅蛋糕模代替。

材料：

冬菇.......3至4隻

雞蛋..............4隻

芝士碎..........適量

金菇.............適量

蟲草花..........適量

芫荽.............適量

薑絲.............少許

水.................80ml

麻油.............少許

調味料：

胡椒粉.....1/2茶匙

生抽...........1茶匙

鹽............1/4茶匙

做法：

1. 清水浸軟冬菇及蟲草花，洗淨後飛水及揸乾水份，冬菇沿邊剪成幼條狀再切段，蟲草花除去硬嘅部分（如有）。

2. 金菇及芫荽切段，切好薑絲。

3. 雞蛋落調味料打散，再加水分攪勻。將處理好嘅冬菇、蟲草花、芝士碎、金菇、芫荽及薑絲放落蛋液中拌勻，再倒入已搽油嘅6吋砵仔中，蛋漿唔好蓋過材料表面，等材料可以露出。之後，用中火隔水蒸8至10分鐘或蛋漿全熟。

4. 喺蛋面掃上一層麻油，再放入預熱焗爐，以200度焗8至10分鐘或至蛋面變成靚靚嘅金黃色。最後，撒少少白胡椒粉會更加惹味。