聞西──菲律賓醋燒雞 如他鄉故事酸中帶甜

根據政府統計數字，宜家香港大約有33萬外傭，雖然叫外傭，不過唔係個個都十項全能。前排有朋友呻佢最近請嘅工人姐姐唔識煮飯，餐餐都要捱劣食，有時甚至叫外賣同工人一齊食，聽落都有啲好笑又可憐。我諗起以前舊居隔離屋個姐姐，未嚟香港之前原來係個小學老師，因為收入考慮先決定離鄉別井做外傭。雖然僱傭公司有提供基本訓練，不過佢自幼喺屋企有媽咪照顧，宜家反而要照顧人哋全家，初初都覺得好吃力。幸而佢勝在坦白又肯學，僱主又肯畀機會同時間等佢進步，終於成為廚藝高手。

外傭姐姐當然有唔同嘅質素，但可以肯定佢哋離開家人遠洋而來，照顧我哋有需要嘅家庭，身為僱主就係畀多啲鼓勵同支持啦。話說回來，其實姐姐家鄉都有好多靚餸，叫佢哋煮返家鄉菜都係一個唔錯嘅選擇，分分鐘會有驚喜呢！例如今次介紹嘅「菲律賓醋燒雞」（Chicken Adobo）。

Chicken Adobo喺菲律賓家傳戶曉嘅菜式，亦都係一個容易煮嘅家常菜，味道香濃酸中帶來甜好鬼開胃，個汁撈飯一流。其實，Adobo係西班牙、葡萄牙菜其中一種烹調手法，用醋、鹽及香料醃製肉類或者海鮮，傳入菲律賓之後又演變到以豉油代替咗鹽，口味同中菜都差唔多。

材料：

雞扒或者雞髀.....................600g

甘筍...................................250g

洋蔥....................................1個

蒜頭.....................3粒（剁成蓉）

紅糖（brown sugar）.........2湯匙

黑胡椒粒..........................1湯匙

蔥段...................................適量

醃料：

日式醬油................80ml

白醋.....................100ml

香葉.................3至4片

蒜頭..........3粒（剁成蓉）

做法：

1. 雞髀切件，落醃料醃半個鐘，我用咗日式醬油就唔怕過鹹。

2. 洋蔥切粒、甘筍去皮切件。開鑊落油將雞件煎至金黃，然後夾起，醃料保留。

3. 同鑊再落油，炒香洋蔥粒及蒜蓉，加入甘筍略炒。

4. 將雞件回鑊，倒入醃料，再加入紅糖及黑胡椒粒。然後倒入400ml水，冚蓋煮至滾起計，以中火燜煮約30分鐘至收汁，最後撒下蔥段裝飾。